Қўшма Штатлар Украинага F-16 қирувчи самолётларини етказиб бериш ниятида эмас. Бу ҳақда АҚШ президенти Жо Байден маълум қилди. Reuters агентлигининг ёзишича, Байден Оқ уйда ўтказилган матбуот анжуманида бу борадаги саволга «йўқ» дея жавоб қайтарган.

Кейинроқ Байден администрацияси вакили АҚШ Украинага шундоқ ҳам катта ҳажмдаги қуролланишларни етказиб бераётганини маълум қилган.

Украина ҳукумати ўз олдига АҚШ, Германия ва бошқа давлатлар Киевга танклар етказиб беришга рози бўлганидан кейин ғарб қирувчиларини олишга эришишни мақсад қилиб қўйган. АҚШ бир неча бор самолётларни юборишнинг имкони йўқлигини маълум қилган. Шу билан бирга, Европа қанчадир вақтдан кейин, жанговар ҳаракатлар давом этишига қараб, ушбу позиция ўзгариши мумкинлигини билдирган.

Франция президенти Эммануэл Макрон 30 январь куни Украинага самолётлар етказиб берилиши ҳақидаги хабарларга изоҳ бериб, «умуман олганда, ҳеч нарса тақиқланмаган», деганди.

Аввалроқ АҚШ президенти Украинага 31 та Abrams танкларини етказиб беришини эълон қилганди. Кейинроқ Байден Украинага жўнатилиши айтилган 31 та Abrams M1A2 танклари камида 2023 йил охирларида Киевга етказиб берилишини айтганди. Байденнинг сўзларига кўра, ушбу танклар Украина Қуролли Кучларига «очиқ майдонда яхшироқ манёвр қилишига» ёрдам беради. АҚШ президенти, шунингдек, Германияга Киев учун Leopard танкларини беришга қарор қилгани учун миннатдорчилик билдирган. Унинг таъкидлашича, бу яна бир бор Украина иттифоқчиларининг бирдамлигини ҳамда Россиянинг уларни бўлиб юборишга бўлган уриниши фойдасиз эканини кўрсатган.

Эслатиб ўтамиз, декабрь охирларида АҚШ Украинага 1,85 млрд долларлик янги ёрдам пакетини расман эълон қилганди. Шунингдек, январь бошларида Донецкдаги «ПТУ»га берилган ракета зарбалари оқибатида камида 63 нафар россиялик ҳалок бўлгани, АҚШ Украинага Стрйкер зирҳли транспортёрларини етказиб бериши маълум бўлган.