Эрондаги мудофаа корхоналарига дронлар томонидан уюштирилган ҳужум «Моссад»нинг операцияси ҳисобланади. Бу ҳақда The Wall Street Journal ўз манбаларига таяниб хабар берди.

Манбаларнинг сўзларига кўра, операция ташкилотчилари ўз мақсадига эришган, чунки дронлар Эрон марказидаги Исфаҳон шаҳрида жойлашган «Мудофаа вазирлигининг қуроллар ишлаб чиқариш бўйича илғор объектига» зарба берган.

Шунингдек, турли тўртта тумандаги бинолар аниқ зарбалар билан ишғол этилган. Сунъий йўлдошдан олинган суратлардан кўриш мумкинки, объектлардан бирининг том қисмига бир оз шикаст етган, аммо нашр суҳбатдошлари барибир «Моссад»нинг операциясини муваффақиятли ҳисоблаган.

Газетанинг аниқлашича, Эрондаги ҳужум уюштирилган Мудофаа вазирлиги объектлари бир-бирига яқин масофада жойлашган бўлиб, улар Эрон космик тадқиқотлар марказига тегишли ҳисобланади. Мазкур марказ баллистик ракеталарни яратиш дастури билан шуғуллангани учун АҚШ унга санкция қўллаганди.

Исроиллик таҳлилчи Ронен Соломоннинг айтишича, Космик тадқиқотлар марказида Материаллар ва энергия институти жойлашган бўлиб, у учувчисиз бошқариладиган учиш қурилмаларини яратиш билан шуғулланади.

29 январга ўтар кечаси Эроннинг Исфаҳон шаҳридаги мамлакат Мудофаа вазирлигига тегишли заводларнинг бирида портлаш содир бўлди. Эрон Ҳарбий идораси ишлаб чиқариш мажмуасига мини-дронлар томонидан уюштирилган «омадсиз ҳужум» ҳақида маълум қилди. Дронлардан бири ҳаво ҳужумидан мудофаа воситалари орқали уриб туширилган, яна иккитас «мудофаа тузоғига тушиб қолиб, портлаб кетган». Эрон Мудофаа вазирлиги ўз баёнотида заводга ҳужум қилган дронлар кимга тегишли эканига аниқлик киритмаган. Вазирликка кўра, ҳеч ким жабр кўрмаган, цехлардан бирининг том қисмига шикаст етган.