Жаҳонгир Ортиқхўжаевнинг сенаторлик ваколати муддатидан аввал тугатилди
Ўзбекистон Марказий сайлов комиссиясининг 30 январдаги қарори билан Тошкент шаҳри собиқ ҳокими ва халқ депутатларининг Тошкент шаҳар Кенгаши депутати Жаҳонгир Ортиқхўжаев Олий Мажлис Сенати аъзолари рўйхатидан чиқарилди. Бу ҳақда МСК қарорида келтирилган.
Қарор халқ депутатлари Тошкент шаҳар Кенгаши депутати ваколатлари муддатидан олдин тугатилгани, шунингдек, унинг Сенат аъзоси сифатидаги ваколатларини зиммасидан соқит қилиш тўғрисидаги ёзма аризасини ҳисобга олган ҳолда қабул қилинган.
Аввалроқ Тошкент шаҳар собиқ ҳокими Жаҳонгир Ортиқхўжаевнинг шаҳар кенгаши депутатлиги ваколати муддатидан олдин тўхтатилгани тўғрисида хабар берилганди. Собиқ ҳокимнинг ўзи депутатлик ваколатларини топшириш тўғрисида ариза билан мурожаат қилган.
Жаҳонгир Ортиқхўжаев 2020 йил январь ойида 48-сайлов округидан ЎзЛиДеП партиясидан дастлаб Кенгаш депутати, сўнгра беш йиллик муддатга сенатор этиб сайланган эди. Унинг ваколат муддати 2025 йилнинг январигача.
Маълумот учун, сенатор ва Кенгаш депутати тегишли ҳудудда Сенат ва Кенгашнинг розилигисиз жиноий жавобгарликка тортилиши, қамоққа олиниши, қамоққа олиниши ёки суд тартибида маъмурий жазога тортилиши мумкин эмас. Депутатни дахлсизликдан маҳрум қилиш тўғрисидаги масала шаҳар прокурори ёки юқори турувчи прокурорнинг тақдимномасига биноан халқ депутатлари кенгаши томонидан 10 кун муддатда ҳал қилинади. Сенаторни дахлсизликдан маҳрум қилиш учун эса Ўзбекистон бош прокурорининг тақдимномаси талаб этилади. Бош прокурорнинг сенаторни жиноий жавобгарликка тортиш, қамоққа олиш, қамоққа олиш ёки суд тартибида қўлланилган маъмурий жазони қўллашга розилик олиш тўғрисидаги тақдимномаси Сенат томонидан ўз мажлисида, Сенат мажлислари оралиғида эса унинг кенгаши томонидан кўриб чиқилади.
Эслатиб ўтамиз, Шавкат Мирзиёев 16 январь куни бўлиб ўтган йиғилишда ҳокимнинг истеъфога чиқишини маълум қилган эди. «Қиш мавсумига лозим тайёргарлик қилмагани учун Тошкент шаҳри ҳокими Ортиқхўжаевни кечаси штабда ишдан олдим. Қуруқ гап билан, ёлғон ‘сводка’ билан пастга тушмагани учун, ноинсоф, оёғи ердан узилгани учун уни ишдан олдим», — деган давлат раҳбари. Президент Давлат хавфсизлик хизмати ва Бош прокуратурага бугун лавозимидан озод этилган мутасаддиларнинг фаолиятини ўрганиш ва қонун бузилишлари аниқланган тақдирда, қатъий жавобгарликка тортишни топширган.
Шу куни собиқ ҳоким ва унинг оиласи Uzbekistan Airways авиакомпаниясининг Туркиянинг Истанбул шаҳрига кечикиб учган HY-271 рейси бўйича рўйхатдан ўтгани маълум бўлганди. Парвоз 16 январь куни соат 07:40 да амалга оширилиши керак эди. Ҳуқуқ-тартибот идоралари Ўзбекистондан учиб кетмоқчи бўлган Жаҳонгир Ортиқхўжаевни тўхтатиб қолгани айтилди.
