Transparency International халқаро нодавлат ташкилоти томонидан Коррупцияни қабул қилиш индекси бўйича 2022 йил натижалари эълон қилинди. Бу ҳақда Коррупцияга қарши курашиш агентлиги матбуот хизмати хабар берди.

Қайд этилишича, 180 та давлат орасида Ўзбекистон 31 балл билан 126-ўринни эгаллаган. Мамлакат балларини 3 тага ошириб, ўрнини 14 поғонага яхшилашга (2021 йилда 140 ўрин) муваффақ бўлган.

«Коррупцияни қабул қилиш индекси 1995 йилдан буён эълон қилиниб келинадиган давлат тизимида коррупцияни қабул қилиниш даражасини акс этувчи ҳамда экспертлар ва ишбилармонлар сўрови асосида шаклланувчи 13 та манбадан ташкил топган ҳар йиллик индекс ҳисобланади. Ўзбекистон мазкур манбаларнинг 7 таси бўйича баҳоланади», дейилади агентлик хабарида.

Ўзбекистон мазкур индексда сўнгги 6 йил давомида ўсиш суратларини қайд этаётган (2017 йилда 22 баллдан 2022 йилда 31 баллгача) давлат сифатида Шарқий Европа ва Марказий Осиё минтақасининг аксилкоррупция ислоҳотларини тизимли равишда амалга ошираётган давлатлар қаторида қайд этилган.

Аввалроқ Антикоррупция агентлиги ҳокимликлар тадбиркорларнинг машиналардан фойдаланаётганига муносабат билдиргани, Ўзбекистон ССВ тизимида 2023 йил «Коррупцияга қарши кураш йили» деб эълон қилингани тўғрисида хабар берилганди. Шунингдек, Ўзбекистонда 2022 йилда коррупция ҳақида хабар берган қанча одам мукофотлангани маълум қилинган эди. Унга кўра, Бош прокуратура томонидан 2022 йилда жами 68 нафар шахслар коррупцияга оид ҳуқуқбузарлик ҳақида хабар берганлиги ёки коррупцияга қарши курашишга бошқа тарзда кўмаклашганлиги сабабли рағбатлантирилган. Шунидан, 68 нафар шахснинг 22 нафарига пул мукофоти, 42 нафарига ташаккурномалар ва 4 нафарига эса эсдалик совғалар топширилган.