Душанбе шаҳрида 23-30 январь кунлари Тожикистон—Ўзбекистон қўшма демаркация комиссияси ишчи гуруҳларининг навбатдаги йиғилиши бўлиб ўтди. Бу ҳақда ҳукумат портали хабар берди.

Қайд этилишича, йиғилишда Ўзбекистон—Тожикистон давлат чегарасининг лойиҳа демаркация чизиғидан ўтказиш масалалари, шунингдек, демаркация хариталарини яратишнинг технологик жараёни муҳокама қилинган.

Музокаралар доирасида икки мамлакат давлат чегараларининг алоҳида участкаларида дала ўрганиш ҳам ўтказилган. Тадбир якунида тегишли баённома имзоланган.

Таъкидланишича, навбатдаги учрашув Ўзбекистон ҳудудида бўлиб ўтади.

Аввалроқ Ўзбекистон, Қирғизистон ва Тожикистон ўртасида чегара бўйича протокол имзолангани хабар берилганди. Ўзбекистон ҳудудига тегишли бўлган иккита қишлоқ расмий равишда Қозоғистонга ўтгани маълум қилинган. 2022 йилнинг ноябрида эса Тошкент шаҳрида 14-19 ноябрь кунлари Ўзбекистон—Қозоғистон қўшма демаркация комиссиясидаги Ўзбекистон ва Қозоғистон ҳукумат делегацияларининг 100-мажлиси бўлиб ўтганди. Унда томонлар қўшма демаркация комиссияси фаолияти тўғрисидаги якуний баённомани ҳам имзолаган эди.

Декабрь ойида Ўзбекистон ва Қирғизистон давлат чегарасини демаркация қилиш бўйича ишчи гуруҳларнинг учрашуви якунланганди. Томонлар Ўзбекистон—Қирғизистон давлат чегарасини демаркация қилиш бўйича ишларни тартибга солувчи ҳуқуқий ва техник ҳужжатлар лойиҳаларини тайёрлаган. Учрашув дўстлик ва ўзаро ҳамжиҳатлик муҳитида ўтди. Тадбир якунлари бўйича протокол имзоланган.