Қорақалпоғистоннинг Нукус туманидаги уйлардан бирида 31 январь куни соат 07:55 ларда газ чақнаши содир бўлди. ФВВ матбуот хизматининг хабар беришича, ҳодиса оқибатида тўрт киши жароҳатланган.

«Бугун, 31 январь куни соат 07:55 ларда Қорақалпоғистоннинг Нукус туманидаги «Октерак» МФЙда жойлашган 2 қаватли уйда газ-ҳаво аралашмасининг чақнаши содир бўлган. Ҳодиса жойига зудлик билан туман ФВ бўлими ёнғин-қутқарув экипажлари етиб борган», — дейилади ФВВ хабарида.

Шунингдек, воқеа жойига ФВБ, ИИБ, ССБ, прокуратура ҳамда «Ҳудудгазтаъминоти» ҳодимлари ҳам етиб борган. Аниқланишича, чақнаш оқибатида 4 нафар фуқаро турли даражада тан жароҳати олиб, Нукус тумани тиббиёт бирлашмасига ётқизилган. Ҳозирда улар шифокорлар назоратида қолмоқда.

Ҳозирда чақнашнинг сабаби ҳамда зарар миқдори аниқланмоқда. Бундан ташқари, мазкур ҳолат юзасидан дастлабки тергов олди суриштирув ишлари ҳам бошланган.

Аввалроқ Қорақалпоғистоннинг Нукус шаҳридаги кўп қаватли уйларнинг бирида газ портлаши оқибатида ҳалок бўлганлар сони 5 нафарга етгани, шунингдек, Сурхондарёда лицей қозонхонаси портлаши оқибатида икки киши ҳалок бўлгани ҳақида хабар берилганди.