«Тошшаҳартрансхизмат» Тошкент шаҳрида 94-сонли автобус орқа ойналари синган ҳолда йўналишга чиққанига оид эътирозларга муносабат билдирди.

Telegram’даги «Ко дну» канали пойтахт кўчаларида абгор ҳолатда йўналишга чиқиб, йўловчиларга хизмат кўрсатаётган автобус суратини эълон қилди. «Ойнаси йўқми? Пакет билан япамиз. Орқа ёки габарит чироқларига цингами? Ҳеч нарса қилмайди, ўтиб кетади. Юряптику…”, дейилади хабарда.

Қайд этилишича, «7-автобус саройи» филиали тасарруфидаги, давлат рақами 01|129 YFA бўлган, MAN русумли, 94-сонли йўналишида хизмат кўрсатувчи ушбу автобус 2018 йил ишлаб чиқарилган бўлиб, тасарруф бошидан буён 346 115 километр масофани босиб ўтган.

Дастлабки маълумотга кўра, 94-сонли автобус ҳайдовчиси Ш.Ш. автобус саройи ҳудудида ўзига бириктирилган автобусни орқа ойнасини эҳтиётсизлик оқибатида синдириб олган. Шунингдек, ўз хизмат вазифасига масъулиятсизлик билан ёндошгани ва автобусни носоз ҳолатда йўналишга чиқаргани учун навбатчи механик Ш.С. билан тузилган меҳнат шартномаси бекор қилинган. Бундан ташқари, «7-автобус саройи» бош муҳандисига ҳайфсан интизомий чораси кўрилган.

«‘Тошшаҳартрансхизматʼ АЖ томонидан ‘7-автобус саройиʼ филиали мутасадди раҳбарларига тегишли кўрсатмалар берилди ҳамда барча ишчи ходимларга навбатдан ташқари йўриқнома ўтказилиб, йўловчиларни хавфсиз ташиш ва уларни ўз манзилларига соғ-омон етказиб қўйиш энг олий мақсадимиз эканлиги юзасидан яна бир бор тушунтириш ишлари олиб борилганлигини маълум қиламиз», дейилади муносабатда.

Аввалроқ Тошкент шаҳар Яккасарой туманида ҳаракатланиб кетаётган Mercedes-Benz русумли ўйловчи ташишга мўлжалланган автобусда ёнғин содир бўлгани, аномал совуқ Тошкентдаги автобуслар фаолиятига таъсир кўрсатгани, Тошкентда йўловчилар билан қўпол муомалада бўлган электробус ҳайдовчиси ишдан олингани тўғрисида хабар берилганди.