Ижтимоий тармоқларда қармоқ ёрдамида сақоқушнинг овланаётгани акс этган видеолар тарқалди. Табиат ресурслари вазирлигининг хабар беришича, видеотасвирда кўрсатилган ҳудуд ва фуқаро шахсини аниқлаш ишлари олиб борилган.

Унга кўра, мазкур ҳолат Жиззах вилоятининг Арнасой туманида жойлашган кўлда фуқаро Э.Д. томонидан бир бош сақоқуш (пеликан)ни қармоқ ёрдамида ушлаб, нобуд қилгани аниқланди.

Ҳолат бўйича «Ҳайвонот дунёсини муҳофаза қилиш ва ундан фойдаланиш тўғрисида»ги ҳамда «Ов қилиш ва овчилик хўжалиги тўғрисида» ги қонун талаблари бузилган. Шунингдек, сақоқуш (пеликан) Ўзбекистон «Қизил Китоби»га киритилган тур бўлганлиги сабабли ҳуқуқбузарга нисбатан қонуний чора кўриш ва ҳайвонот дунёсига етказилган зарарни ундириш мақсадида тўпланган ҳужжатлар прокуратура органларига тақдим этилган.

Аввалроқ Олимпиада чемпиони Фазлиддин Ғойибназаров қуш овлагани ҳақида хабар берилганди. Табиат ресурслари вазирлиги ов жараёнида қонунбузарликка йўл қўйилгани ва табиатга зарар етказилганини тасдиқлаганди.