Сурхондарё вилояти «Узун» давлат ўрмон хўжалиги ҳудудида тахминан 11 ойлик айиқ боласи топилгани тўғрисида хабар берилганди. Табиат ресурслари вазири Азиз Абдуҳакимов ушбу айиқ боласига ном қўйиш бўйича танлов эълон қилди.

Мазкур айиқ Тянь-Шань қўнғир айиғи турига мансуб бўлиб, Табиатни муҳофақа қилиш халқаро иттифоқининг «Қизил рўйхати» ва Ўзбекистон «Қизил китоби»га киритилган. Дастлаб айиқни очиқ табиат қўйнига қўйиб юбориш масаласи муҳокама қилинган. Аммо айни давмда аномал совуқдан кейин озуқа топпиш қийинлиги, ёш айиқ боласини турли кўнгилсизликлардан асраш мақсадида Тошкент ҳайвонот боғига олиб келинган.

«Бундай турдаги айиқлар кам тарқалган, Ўзбекистон фаунаси учун ноёб тур ҳисобланади. Шу боисдан Тошкент ҳайвонот боғи маъмурияти ёрдами билан айиқ боласини замонавий реабилитация марказига жойлаштирдик. Айни дамда айиқ боласининг аҳволи яхши», — дейди вазирлик бошқарма бошлиғи Абдурашид Содиқов.

Шунингдек, Содиқовнинг сўзларига кўра, табиат ресурслари вазири Азиз Абдуҳакимов ташаббуси билан айиқ боласига ном қўйиш учун танлов эълон қилинади. Танлов ғолиби йил давомида Тошкент ҳайвонот боғига бепул кириш ҳуқуқини берувчи сертификат билан тақдирланади.

Маълумот учун, Карантин муддати тагагач, айиқ боласининг ҳолатига қараб, уни очиқ табиатга қўйиб юбориш режалаштирилган.