Тошкент шаҳар Янгиҳаёт туманида 31 январь куни зўрлик ва қотиллик аломатлари билан 12 ёшли қизнинг мурдаси топилди. Бу ҳақда Бош прокуратура матбуот хизмати хабар берди.

Мазкур ҳолат юзасидан Янгиҳаёт тумани прокуратураси томонидан Жиноят кодексининг 97-моддаси (Қасддан одам ўлдириш) 2-қисми «в,з» бандлари билан жиноят иши қўзғатилган. Жиноят иши бўйича гумонланувчи шахс (29 ёшли эркак) Жиноят-процессуал кодексининг 221-моддаси тартибида ушланган.

Қайд этилишича, гумонланувчи шахс марҳуманинг хонадонида 2022 йилнинг ёз ойиларида ёлланма ишчи сифатида таъмирлаш ишларини амалга оширган.

«Мазкур иш бўйича ҳақиқатни аниқлашга тўсқинлик қилиш ҳолатларини олдини олиш мақсадида фуқароларнинг шаъни ва қадр-қимматини камситадиган маълумотлар ва бошқа тафсилотлар ошкор қилинмайди», — дейилади хабарда.

Аввалроқ Фарғонада бедарак йўқолган аёл мурдаси Қирғизистондан топилгани, Фарғонада ногирон қизига тегажоғлик қилган қўшнисини ўлдириб қўйган ота-бола иши судда кўриб чиқилгани, Тошкентда 6 ёшли қизга тегажоғлик қилган эркакка нисбатан жиноят иши қўзғатилгани тўғрисида хабар берилганди. Шунингдек, Тошкентда эркак 17 ёшли қизнинг ортидан таъқиб қилиб, уйнинг йўлагигача кириб боргани, Тошкентда пенсионер аёлга тегажаклик қилмоқчи бўлган йигитга суд ҳукми ўқилгани, Фарғонада ота қизларига тегажоғлик қилгани маълум бўлганди.