АҚШ Федерал заҳира тизими (ФЗТ) 25 та базис пункти бўйича базавий ставкани оширди — йиллик 4,25—4,5 фоиздан 4,5—4,75 фоизгача. Қарор Очиқ бозорларда операциялар ўтказиш бўйича федерал қўмита (FOMC) йиғилсиши якунида бир овоздан қабул қилинган ва кўплаб таҳлилчиларнинг кутилмаларига мутлақо мос келган.

ФЗТнинг бу борадаги пресс-релизида қайд этилишича, Украинадаги уруш «катта инсоний ва иқтисодий қийинчиликларни келтириб чиқармоқда» ва глобал ноаниқликнинг кучайтиряпти. Федераль заҳира тизими базавий ставкани кейинчалик ҳам кўтаришни режалаштирган — бу инфляцияни 2 фоизли даражага қайтариш мақсадида амалга ошириляпти.

Бу ставканинг 2023 йилда биринчи марта оширилиши. Ўтган йил давомида ФЗТ ставкани етти маротаба, умумий ҳисобда 450 базавий пунктга оширганди.

ФЗТ ставкаларни кўтариш орқали курашаётган АҚШдаги инфляция декабрь ойи якунлари бўйича 6,5 фоизга қадар секинлашган. 2022 йил ёзида инфляция рекорд даражага — 9,1 фоизга чиқиб кетганди. Охирги марта базавий Ставка 4,5—4,75 фоиз даражасига 2007 йил октябрда кўтарилган эди.

Эслатиб ўтамиз, 2021 йилда АҚШ ҳукумати ўз тарихида биринчи марта дефолт эълон қилиши мумкинлиги айтилганди. Ўшанда Сенатнинг навбатдаги йиғилишида Конгресс қонуний қарз чегарасини кўтармаса, Молия вазирлиги умуман пулсиз қолиши мумкинлигини, бу ўз навбатида, мамлакатда дефолт эълон қилинишига сабаб бўлиши маълум қилинганди.