Тошкент шаҳар Янгиҳаёт туманида зўрлик ва қотиллик аломатлари билан 12 ёшли қизнинг мурдаси топилганилгани тўғрисида хабар берилганди. Жиноят иши бўйича гумонланувчи шахс (29 ёшли эркак) Жиноят-процессуал кодексининг 221-моддаси тартибида ушланган. Ушбу воқеага пойтахт Оила ва хотин-қизлар бошқармаси муносабат билдирди.

Оила ва хотин-қизлар бошқармаси ходимлари ва маҳалла фаоли марҳуманинг хонадонига бориб чуқур ҳамдардлик билдирилганини маълум қилди.

«Барча ота-оналарга илтимос: ўзингиз ҳамроҳлик қилинг ва фарзандларингизни мактабга олиб бориб мактабдан олиб кетинг. Улар билан доимо алоқада бўлинг», — дейилади бошқарма хабарида.

Ўзбекистонда гендер зўравонлигига қарши лойиҳа — Nemolchi.uz асосчиси Ирина Матвиенко Газета.уз’га бошқарманинг мазкур баёноти бўйича изоҳ берди.

«Оила хотин-қизлар бошқармаси аёллар ёки ҳалок бўлган қизнинг ота-онаси ҳақида ўйлаганида бунақа ёзмаган бўларди деб ўйламан. Фожиа юз бермаслиги учун нечанчи синфгача олиб кетиш керак? Ахир аёллар ёшидан қатъий назар зўравонликка учраяптику. Қиз 12 ёшда эди. Бундай ёшда кўплаб болалар мустақил равишда мактабга, машғулотларга боради, жамоат транспортидан фойдаланади. Ишлайдиган кўплаб ота-оналарда болаларни мактабдан олиб кетишга имконият йўқлигини тушунишимиз керак. Болалар хавфсиз бўлиши учун давлат нима қилди?», — дея таъкидлайди Ирина Матвиенко.

Матвиенко жиноятчи фуқаролар томонидан ўрнатилган камералар орқали аниқланганини эслатиб ўтган.

«Атрофда бундай камералар йўқ бўлганида нима бўларди? Давлат томонидан яратилган ишловчи тизим қани? Балки, давлат ташкилотлари ота-оналар фойдасиз маслаҳатлар бермасдан, содир бўлган воқеада билвосита жабрланувчининг ўзини айбламасдан комплекс хавфсизлик тизими мавжуд эмаслигига эътибор қаратиши керакдир», — дейди у.

Аввалроқ Фарғонада бедарак йўқолган аёл мурдаси Қирғизистондан топилгани, Фарғонада ногирон қизига тегажоғлик қилган қўшнисини ўлдириб қўйган ота-бола иши судда кўриб чиқилгани, Тошкентда 6 ёшли қизга тегажоғлик қилган эркакка нисбатан жиноят иши қўзғатилгани тўғрисида хабар берилганди. Шунингдек, Тошкентда эркак 17 ёшли қизнинг ортидан таъқиб қилиб, уйнинг йўлагигача кириб боргани, Тошкентда пенсионер аёлга тегажаклик қилмоқчи бўлган йигитга суд ҳукми ўқилгани, Фарғонада ота қизларига тегажоғлик қилгани маълум бўлганди.