Украинага 150 километрдан ортиқ масофага учишга қодир GLSDB ракеталари етказиб берилиши мумкинлиги сабаб Россия ҳарбийлари жанговар ҳаракатлар тактикасини ўзгартириши мумкин. Бу ҳақда Reuters агентлиги экспертларга таяниб хабар берди.

Вашингтондаги Стратегик ва халқаро тадқиқотлар марказининг қуролланиш ва хавфсизлик бўйича эксперти Том Караконинг ҳисоблашича, Украинага янада узоқроққа мўлжалланган қуроллар керак, аммо GLSDB’ни етказиб берилиши ҳам «ҳақиқатда муҳим қадам» бўлиб, русларни украина ҳарбийлари қандай чора кўришини «тахмин қилишга мажбур этади».

Украиналик ҳарбий эксперт Александр Мусиенконинг сўзларига кўра, ҳозирда Киев ихтиёрида мавжуд қуролланиш ёрдамида мамлакат қуролли кучлари 80 километрдан узоқроқдаги объектларга ҳужум уюштира олмайди. Бироқ GLSDB’ларнинг етказиб берилиши билан вазият ўзаради, Россия кучлари «мослашишга» ва «ҳарбий объектларини фронт чизиғидан узоқроққа кўчириш»га мажбур бўлади.

Январь ойида Украина Мудофаа вазирлиги Разведка бош бошқармаси вакили Вадим Скибицкий Россия ҳарбийлари жанг майдонида «ўз хатоларидан хулоса чиқараётгани» сабаб Киевга узоқ масофага мўлжалланган ракеталар кераклигини айтганди. Украина собиқ мудофаа вазири Андрей Загороднюк эса Reuters билан суҳбатда GLSDB’ларнинг берилиши вазиятни сезиларли даражада ўзгартириб юборади.

GLSDB’ни Boeing ва Saab Group компанияси яратган. Уни HIMARS реактив залп ўт очиш тизимларидан ҳам учириш мумкин. Бугунги кунда ушбу тизимлар учун Киевга 80 километр узоқликка учишга қодир GMLRS ракеталари етаказиб бериляпти. Аввалроқ Bloomberg GLSDB АҚШ томонидан Украинага кўрсатиладиган янги ёрдам пакетидан ўрин олишини тасдиқлаган эди. Шунингдек, Ғарб давлатлари Украина расмийларининг ташаббуси билан Киевга реактив қирувчи самолётларни етказиб бериш имкониятини муҳокама қилишни бошлаган.

Эслатиб ўтамиз, декабрь охирларида АҚШ Украинага 1,85 млрд долларлик янги ёрдам пакетини расман эълон қилганди. Шунингдек, январь бошларида Донецкдаги «ПТУ»га берилган ракета зарбалари оқибатида камида 63 нафар россиялик ҳалок бўлгани, АҚШ Украинага Стрйкер зирҳли транспортёрларини етказиб бериши маълум бўлган.