Ўзбекистонда автомобилларга газ тўлдириш компрессор шохобчаларига (АГТКШ) беш баробар кўпроқ газ етказилади. Бу ҳақда Шавкат Мирзиёев 3 февраль куни Наманган вилоятида тадбиркорлар билан учрашувда айтиб ўтди, деб ёзади ЎзА бош директори ўринбосари Хушнудбек Худойбердиев.

Қайд этилишича, бир ҳафта ичида метан ёнилғи қуйиш шохобчалари кунига ҳозирги 1 миллион ўрнига 5 миллион кубометр газ олади. Умуман олганда, саноат ва хизмат кўрсатишни тиклаш учун республика бўйича кунига 80 миллион куб метр газ ва 126 миллион киловатт/соат электр энергияси етказиб берилади.

Аввалроқ Ўзбекистонда 30 январдан бошлаб айрим автомобилларга газ тўлдириш компрессор станцияларининг фаолияти қайта тиклана бошлангани ҳақида хабар берилганди. Кейинроқ Энергетика вазирлиги 2 февралдан бошлаб барча ҳудудлардаги АГТКШлар фаолияти босқичма-босқич тикланишини маълум қилди. Декабрь бошидан Тошкентдаги газ қуйиш шохобчалари вақтинча ёпилган. Об-ҳаво ҳарорати кескин пасайгани сабабли шаҳрнинг айрим ҳудудларида газ ва иссиқлик таъминотида узилишлар кузатилди — коммунал хизматлар мавжуд газ заҳирасини барча истеъмолчилар орасида тенг тақсимлашга уринишига қарамай, ресурслар етишмади.

Эслатиб ўтамиз, аввалроқ Навоийда «метан заправка» 2 мингта хонадоннинг бир ойлик истеъмолига етадиган газни талон-торож қилгани аниқланганди ҳамда Андижон ва Жиззахда 900 млн сўмдан ортиқ газ ҳисоблаш ускуналари талон-торож қилинганди. Шунингдек, «Мароқанд нефть базаси»нинг Булунғур ва Жомбой филиалларида 73 миллиард 775 миллион сўмлик талон-торож ва камомад аниқлангани ва Навоийда электрон ҳисоблагични ўзгартирган газ «заправка» 1,5 миллиард сўмлик зарар етказгани ҳақида хабар берилганди.