Прогнозлаштириш ва макроиқтисодий тадқиқотлар институти (ПМТИ) мутахассислари томонидан сўнгги йилларда Ўзбекистонда саноат соҳасида амалга оширилган ислоҳотлар ва уларнинг энг муҳим натижалари ўрганилди.

Қайд этилишича, 2017-2022 йилларда саноатнинг ялпи ички маҳсулотдаги улуши 21,1 фоиздан 26,7 фоизга ошган. Бу даврда саноат маҳсулотларини ишлаб чиқаришдаги ўсиш 141,3 фоизни ташкил қилган. Бундай барқарор ўсиш ЯИМда саноатнинг улуши ортишига олиб келган. Ишлаб чиқарадиган саноат тармоғи жадал суръатлар билан ривожланиб, ўсиш суръати ўтган давр мобайнида 147,4 фоизни ташкил этган. Бундан ташқари, электр, иссиқлик ва газ таъминоти тармоғи (139,2 фоиз), шунингдек, тоғ-кон саноати (130,4 фоиз) жадал суръатларда ривожланган.

«Ўзбекистон саноатининг 83,2 фоизини ишлаб чиқарадиган саноат тармоғи ташкил этади. Бу юқори қўшимча қийматга эга маҳсулотлар ишлаб чиқаришни кенгайтириш, хом-ашёни қайта ишлаш даражасини ошириш, замонавий технологияларни жорий этишга қаратилган тармоқларни ривожлантириш комплекс дастурлари ҳаётга татбиқ этилаётгани натижасидир», — дейилади хабарда.

Ўрта ва юқори технологияли тармоқлар улушининг 52,7 фоиздан 61,7 фоизга ошгани ҳам саноат таркибидаги сифат ўзгаришларидан далолат беради. Бу ички бозорда ҳам, ташқи бозорда ҳам харидоргир бўлган юқори қўшимча қийматли маҳсулотлар ишлаб чиқариш кўлами ошган. Масалан, портландцемент ишлаб чиқариш шу даврда 1,3 баробар, қўрғошинли аккумуляторлар – 1,4 баробар, автомобиль двигателлари – 2,5 баробар, енгил автомобиллар – 2,3 баробар, совутгич ва музлатгичлар – 3,7 баробар ошган.

Аввалроқ Прогнозлаштириш ва макроиқтисодий тадқиқотлар институти мутахассислари томонидан Ўзбекистонда 2035 йилгача бўлган давр учун аҳоли сони прогнозларининг ижтимоий соҳа ва электр энергияси таъминотига таъсири ўрганилганди. Тадқиқот давомида 2035 йилга бориб Ўзбекистон аҳолиси 45,6 миллион кишидан ошиши аниқланган. Шунингдек, 2035 йилгача бўлган даврда ҳар йили ўрта ҳисобда 900-950 минг гўдак дунёга келади.