Ўзбекистонга 3 февралдан Каспий денгизи ҳудудларидан нам ҳаво массалари кириб келиши бошланади. Бу ҳақда «Ўзгидромет» хабар берди.

Республика ҳудуди бўйича вақти-вақти билан ёмғир ёғади. Жануби-ғарбий ва жанубий ҳудудларда кун давомида, марказий ҳудудларда эса куннинг иккинчи ярмида, Фарғона водийси вилоятларида кечга томон ёмғир ёғиши кутилмоқда. Мамлакат шимолида ёғингарчилик кутилмайди.

4 февраль, шанба куни республика бўйича баъзи жойларда ёмғир ёғади, шимолда ёғингарчилик (ёмғир, қор) бўлади.

5 февраль куни ҳудуднинг катта қисмида ёмғир ёғиши тўхтайди, фақат кечаси ва эрталаб марказий ва шарқий ҳудудларда бироз ёғингарчилик бўлиши мумкин. Ушбу кунларда ҳаво ҳарорати кечалари 0…+5 даража, баъзи жойларда -2 даражагача, кундуз кунлари +5…+10 даража атрофида бўлади.

Пойтахтда жума куни кечга томон ва шанба куни вақти-вақти билан ёмғир ёғади. Якшанба куни асосан ёғингарчилик кутилмайди, фақат кечаси ва эрталаб бироз ёғингарчилик бўлиши мумкин. Ҳарорат асосан кечаси 0…+3 даража, кундузи +7…+10 даража илиқ бўлади. 3−5 февраль кунлари тоғли ҳудудларда қор кўчиши хавфи сақланиб туради.

Аввалроқ 23-27 январь кунлари республиканинг аксарият ҳудудларига нисбатан совуқ ҳаво массаси кириб келиши ва бунинг натижасида ҳаво ҳарорати жойларда кечаси -5…-18 даража совуши прогноз қилинганди. Шу боисдан аномал совуқ сабаб тузилган штаблар фаолияти кучайтирилган ҳолда давом эттирилиши белгиланган. Шунингдек, «Ўзгидромет» Ўзбекистонда 26 январь куни ҳаво ҳарорати кўтарилишини маълум қилган. 30 январда эса Ўзбекистон ҳудудига Ўрта Ер денгизи ҳудудларидан нам ва деярли илиқ ҳаво массалари кириб келиши айтилганди.