Рақобатни ривожлантириш ва истеъмолчилар ҳуқуқларини ҳимоя қилиш қўмитаси электротехника дўконининг «иккинчи хотин»га оид реклама баннерлари реклама қонунчилигини бузганини маълум қилди.

Қайд этилишича, Ўзбекистон ҳудудларидаги ташқи реклама ва ахборот воситалари орқали Elmakon савдо белгисининг «‘Иккинчи хотин’га ғамхўрлик қилинг» мазмунидаги рекламалари жойлаштирилгани маълум бўлган.

«Рақобатни ривожлантириш ва истеъмолчилар ҳуқуқларини ҳимоя қилиш қўмитаси бу каби ноқонуний рекламаларга қатъий равишда қарши», — дейилади хабарда.

«Реклама тўғрисида»ги қонуннинг 16-моддасига асосан, реклама ва ахборот воситаларидан фойдаланган ҳолда миллий ва оилавий анъаналарга, шунингдек ахлоқ ва маънавиятнинг умум қабул қилинган нормаларига зид бўлган шакллар, иборалар ва образлардан фойдаланишга йўл қўйилмайди.

«Оила бу муқаддас даргоҳ. Оила жамиятнинг асосий негизидир. Ўз навбатида, юқоридаги ҳолат қўмита томонидан назоратга олинган ва уларни бартараф қилиниши таъминланди», — дея таъкидланади қўмита хабарида.

Аввалроқ Ўзбекистонда она сутининг ўрнини босувчи маҳсулотларни реклама қилиш тақиқланаётгани, Ўзбекистонда 50 дан ортиқ тотализатор ва букмекерлик рекламасини юритувчи сайтларга кириш чеклангани, Тошкентда бир гуруҳ қизлар ичимлик сувини беҳаё тарзда реклама қилгани тўғрисида хабар берилганди.