Олий Мажлис Сенатида 2022 йилнинг 14 октябрь куни Вьетнам вице-президенти бошчлигидаги делегация билан учрашув бўлиб ўтган. Натижада учрашувга келган 25 нафар меҳмонни овқатлантириш учун Сенат «Sky Events» МЧЖ билан Сенат номидан кечки овқатланишни ташкил этиш бўйича 60 миллион 375 минг сўмлик шартнома имзолагани маълум бўлди.

Хусусан, меҳмонларнинг овқатланиши учун ташкиллаштирилган дастурхонда битта сомсанинг нархи 100 минг сўм, 1 порция ош нархи 215 минг сўм бўлса, дастурхонга тортилган битта ноннинг нархи 360 минг сўмни ташкил қилган.

Шунингдек, вьетнамлик меҳмонларнинг Ўзбекистонга ташрифи давомида транспорт хизматини кўрсатиш учун 9,7 миллион сўм, Олий Мажлис Сенати номидан кечки овқатланиш учун 60,3 миллион сўм, эсдалик совғалари учун 19 миллион сўм ҳамда гулдаста харид қилиш ва уни безатиш учун 5,7 миллион сўм сарфлангани аниқланди.

Умумий ҳисобда Вьетнам делегацияси учун ажратилган харажатларнинг умумий миқдори 94,8 миллион сўмни ташкил этган.

Маълумот учун, аввалроқ ҳам Олий Мажлис Сенати 2022 йилнинг 8-9-сентябрь кунлари Тошкент шаҳрида ўтказилган Парламентлараро иттифоққа аъзо давлатлар аёл раҳбарларининг 14-саммитига келган меҳмонларни овқатлантиришга 1 миллиард 56 миллион сўмдан ортиқ маблағ сарфлаганди.

Хусусан, Сенатнинг саммитга келган меҳмонларни овқатлантириш харажатлари сметасига кўра, 8 сентябрь кунги тушлик ва кечки овқат учун 608 миллион 120 минг сўм, 9 сентябрь кунги кофе брейк ва тушлик учун 448 миллион 500 минг сўм, умумий 1 миллиард 56 миллион 620 минг сўм маблағ сарфланган. Сенат меҳмонларни овқатлантиришни ташкил этиш учун бу сафар ҳам тўғридан-тўғри «Sky Events» МЧЖ билан 1 миллиард сўмдан ортиқ шартнома тузган.