Шавкат Мирзиёев 3 февраль куни Наманган вилоятида тадбиркорлар билан ўтказилган йиғилишда мамлакатда кескин совуқдан жабр кўрган тадбиркорларни қўллаб-қувватлаш чора-тадбирларини маълум қилди, деб хабар берди ЎзА бош директори ўринбосари Хушнудбек Худайбердиев.

Хусусан, республикада 3 мингта ҳудудий саноат корхонасида 7 триллион сўмлик маҳсулот ишлаб чиқарилмаган (уларда 350 минг аҳоли банд). Ҳисоб-китобга кўра, зарур чоралар кўрилмаса, биринчи чоракда ялпи маҳсулот ўсиши 1,5 фоизгача пасайиши мумкин (5 фоиздан 3,5 фоизгача).

«Бу йил қиш ниҳоятда совуқ келди. Кўплаб тадбиркорлар бундан қийналганини билиб турибман. Олдимизда долзарб вазифа — қаттиқ совуқ оқибатларини бартараф этиб, бизнес фаолиятини тезроқ изга тушириш», — дейди Шавкат Мирзиёев.

Иқтисодиётда йўқотишлар ўрнини қоплаш ва бизнесни қўллаб-қувватлаш учун алоҳида қарор имзоланган. Унга кўра, «қаттиқ совуқ»дан қийинчилик кўрган тадбиркорларга кредит, солиқ, божхона ва бошқа тўловлар бўйича енгилликлар берилади. Жумладан:

• 2 минг нафар кичик ва ўрта тадбиркорларнинг январь-мартда муддати келадиган 4,7 триллион сўм кредит тўловлари 1 июнга қадар узайтирилади;
• 29 мингта тадбиркорнинг 2 триллион сўм солиқдан қарзини 1 июлга қадар фоизсиз, қўшимча гаровсиз ва «пеня»сиз бўлиб-бўлиб тўлаш имконияти яратилади;
• қуввати пасайган 545 та саноат корхонасига ишлаб чиқаришни тиклаш ва айланма маблағ учун 8 триллион сўм кредит ажратилади;
• носоз ускуналарни таъмирлашга кредитлар ажратилади, улар бўйича 2,5 миллиард сўмгача кафиллик берилади ва кредит ставкасининг 4,5 фоизи қоплаб берилади;
• 27 мингта тадбиркор учун давлат мулки ижара тўлови 1 апрелга қадар ўзгармайди ва уни бўлиб-бўлиб тўлашга рухсат берилади (тадбиркорларда 52 миллиард сўм қолади);
• давлат мулкини сотиб олган тадбиркорлар учун тўловлар, фоиз ва пеня 1 апрелга қадар тўхтатиб турилади;
• ишлаб чиқариш биноларининг ҳар бир юқори қавати учун тадбиркорларга мол-мулк солиғидан 10 фоиздан чегирма берилади.

Шунингдек, қурилиш ва қурилиш материаллари тармоқларини тезроқ тиклаш учун давлат инвестиция дастуридан 3 триллион сўмлик молиялаштириш шу ҳафтадан очилади.

Эслатиб ўтамиз, аномал совуқ пайтида ҳам электр энергиясида чекловлар киритилди, Энергетика вазирлиги аномал совуқ туфайли саноат корхоналарига газ етказиб беришни камайтирди, совуқ Тошкентдаги автобуслар фаолиятига таъсир кўрсатди. Шунингдек, Ўзбекистонда айрим тадбиркорларга лицензиясиз шуғулланишга рухсат берилагани ва Сенатда тадбиркорларга енгиллик берувчи қонун лойиҳаси маъқуллангани ҳақида хабар қилинганди.