Ўзбекистонда Humo номли миллий мессенжер ишга туширилди. Унинг дизайни ва интерфейси билан худди Telegram’никига ўхшайди. Ушбу мессенжер дастурчилари уни нима сабабдан бундай кўринишда яратишганига изоҳ берди.

«‘Биз бошида қанақа мессенжер қиламиз, нималарга эътибор берамиз, қанақа қулайликлари бўлиши керак?’ деган фикрларни илгари сурдик. Жуда кўпчиликнинг фикри машҳур бўлган Telegram мессенжерига яқинлашаверди», — дейди Unicon Soft дастурчиси Даврон Турсунов.

Шунингдек, у янги Humo мессенжерининг кодлари Telegram’дан кўчирилганми деган саволларга жавоб бериб кетган.

«Telegram’нинг айнан клиент коди очиқ кодли бўлиб, лицензияланган ҳисобланади. Дастурлаш оламида очиқ кодлардан фойдаланиш жуда ҳам кенг йўлга қўйилган. Биз ҳам инсонларга қулай бўлиши мақсадида Humo мессенжерининг UI’ни Telegram’никига ўхшатдик. Одамлар осон мослашиб, тушуниши учун», — дейди у.

Қайд этилишича, Humo мессенжерининг сервер қисми нолдан ёзилиб, миллий криптографик стандартлар қўлланган ҳолда ишлаб чиқилган. Унинг кодларини муаллифлик ҳуқуқи Unicon Soft’га тегишли.

Янги мессенжер ўз кўриниши билан Telegram’дан фарқ қилмаслиги ижтимоий тармоқларда фойдаланувчилари томонидан кулги билан қабул қилинди. Хусусан, блогер ва ҳуқуқшунос Хушнуд Худойбердиев янги дастурдан фойдаланиш учун давлат ташкилотлари ҳар бир ходим учун ойига 25,2 минг сўмдан абонент тўлови тўлаши кераклигини ёзган.

“‘Ооо, зўрку, ваниҳоят миллий мессенжер ишлатар эканмизʼ, дея хурсанд бўлиб, ўша дастурни ишлатмоқчи бўлдим. Аммо дастурни очишим билан, бу Telegram’ми ёки Humo’ми, деб адашиб қолдим. Шоввозларимиз бирга-бир Telegram’дан кўчиришибди. Яна номи Ўзбекистоннинг миллий мессенжери эмиш… Unicon Soft’га биттагина саволим бор: бу шармандаликка қандай чидайсизлар?», — деб ёзади у.

Мессенжернинг ишлаб чиқувчиси – Unicon Soft МЧЖнинг 25 фоиз улуши Рақамли технологиялар вазирлиги ҳузуридаги Unicon.uz Фан-техника ва маркетинг тадқиқотлари маркази унитар корхонасига тегишли. Қолган 75 фоизнинг эгаси эса 4 нафар жисмоний шахс таъсисчилигидаги Prosoft МЧЖ ҳисобланади.

Президентнинг «2022-2023 йилларда ахборот-коммуникация технологиялари соҳасини янги босқичга олиб чиқиш чора-тадбирлари тўғрисида»ги фармони 1-иловаси 87-бандида ушбу миллий мессенжерни ишлаб чиқиш ва вазирлик тизимида синов тариқасида жорий этиш учун «Ахборот-коммуникация технологияларини ривожлантириш жамғармаси» маблағларидан фойдаланиш кўрсатилган.

Эслатиб ўтамиз, 2022 йил августда Инновацион ривожланиш вазирлиги томонидан ўтказиладиган «Миллий мессенжер ва ижтимоий тармоқлар бўйича стартап лойиҳалар» мавзусидаги стартап лойиҳалар танлови эълон қилинганди.