Бухоро вилояти Пешку туманидаги ўқув марказида ноқонуний равишда диний таълим бериб келингани аниқланди, деб хабар беради вилоят ИИБ ахборот хизмати.

Қайд этилишича, 31 январь куни Пешку туманида истиқомат қилувчи 36 ёшли С.Ш. ва 33 ёшли Х.Б. томонидан ташкил этилган «Мисвоҳ» номли ўқув марказида араб тилини ўргатиш баҳонасида 9 нафар вояга етмаган бола ҳамда 19 нафар катта ёшдаги шахсга қонунга хилоф равишда диний таълим бериб келаётгани ички ишлар идоралари томонидан аниқланган.

Бундан ташқари, 30 ёшли Т.М. Telegram месенжерида «Муслималар» номли гуруҳ ташкил қилиб, 8 нафар фуқарога онлайн тарзда диний таълим бераётгани маълум бўлган. Ўтказилган суриштирув тадбирлари жараёнида, Т.М. расмий ҳужжатлари бўлмаган ҳолда араб тилини ўргатиш баҳонасида ноқонуний равишда диний таълим бериб келаётгани аниқланган.

Жавобгар шахслар томонидан Ўзбекистон Олий суди томонидан фаолияти тақиқланган «Салафийлар» ДЭОнинг ғоявий раҳнамоларидан бири бўлган «Содиқ Самарқандий»нинг маърузаларини ижтимоий тармоқлар орқали тарқатиб келгани ҳам маълум бўлган.

Аввалроқ Андижонда 27 нафар болага ноқонуний диний таълим берган эркак қўлга олингани, Сурхондарёда қизларга диний таълим бераётган ноқонуний ҳужра аниқлангани ҳақида хабар қилинганди. Shuningdek, Андижон вилоятида ўз хонадонларида ноқонуний диний таълим бериш билан шуғулланган шахслар аниқланgandi. Хусусан, улардан бири 2022 йилнинг январь ойида ҳам вояга етмаган шахсларга ноқонуний диний таълим бериб келгани боис маъмурий жавобгарликка тортилган. Фуқаро такроран қонунбузарлик содир этгани сабаб ҳолат юзасидан жиноят иши қўзғатилган.