Грузия собиқ президенти Михаил Саакашвилининг қариндошлари собиқ сиёсатчининг соғлиғидан хавотирланиб, уни зудлик билан реанимацияга кўчириш масаласини кўтармоқда. Бу ҳақда Саакашвилининг адвокати Шалва Хачапуридзе маълум қилди, деб хабар беради Медуза.

«Бугун (2 февраль куни) унинг ёнига ташрифни амалга оширдим — вазни 67,5 килограммга тушиб кетибди. У жуда оғир аҳволда ва ҳаракатлана олмаяпти», — дейди адвокат.

Собиқ президентни даволаниш учун Европа ёки АҚШга юбориш кераклиги бўрасидаги чақириқларга Грузия ҳукумати Саакашвилининг оғир аҳволда эканини айтаётган шифокорларга ишонмаслигини билдирган. «Грузин орзуси» ҳукмрон партияси Саакашвининг саломатлиги ҳақидаги хабарларни «мухолифат спекуляцияси» деб атаган, собиқ президентнинг ўзини «ўзини ёлғондан касалга солганликда» айблаяпти.

2 февраль куни Украина Ташқи ишлар вазирлиги мамлакат фуқароси бўлган Михаил Саакашвилига нисбатан «ғайриинсоний муносабатда» бўлинаётгани юзасидан расмий баёнот билан чиқиб, Тбилисини «собиқ президент устидан кулишни зудлик билан тўхтатишга ва уни Украинага қайтаришга» чақирган. Бу Киевнинг Саакашвилини озод қилиш ва Украинага қайтишига рухсат бериш ҳақидаги биринчи талаби эмас. 2022 йил декабрь ойи охирида Владимир Зеленский Саакашвили билан содир бўлаётган воқеаларни «Грузияга тўғри келмайдиган» «масхара» деб атаганди, шунингдек, Грузия расмийларини сиёсатчига «раҳм-шафқат кўрсатиш»га ва уни Украина, Европа ёки АҚШдаги клиникалардан бирига ўтказишга чақирган эди.

Суд мажлисларининг бирида Саакашвили қанақа аҳволда эканини намойиш этиш мақсадида иштирокчилардан узр сўраган ҳолда футболкасини кўтарган эди. Шундан кейин клиникадан амалга оширилган трансляция тўхтатилган. Саакашвилининг ўзи 1 февраль кунги суд мажлисида йиғилганларга украин тилида мурожаат қилганди: «Мени қийноққа солишяпти, мени заҳарлашди. Мен украин халқи билан фахрланаман. Зеленский президент экани билан фахрланаман, ундан миннатдорман. Ғалабага эришишимизга мутлақ ишонаман, аммо бунга қадар жон берсам, юрагим Киевга кўмилиши керак. У Украинага тегишли».

Михаил Саакашвили Грузияга 2021 йил октябрда — саккиз йилдан кейин биринчи марта қайтганди. У қайтиши билан ҳибсга олинган — 2018 йил июнда собиқ президент сиртдан 6 йилга озодликдан маҳрум этилганди. Ўз навбатида Саакашвили ўзини «Путиннинг шахсий маҳбуси» деб атаган.

Ҳибсга олинганидан кейин Саакашвилининг саломатлиги кескин ёмонлашди. 2022 йил майида бери у Тбилисидаги «Вивамед» клиникасида қолмоқда, суд мажлисларида масофадан — видеоалоқа орқали қатнашяпти.