Самарқанд халқаро технология универитети (СХТУ) ўз фаолиятини бошлади. Ҳозирда илк 35 нафар талаба дарсларга қатнамоқда, деб хабар беради университет матбуот хизмати.

Маълум қилинишича, ҳозирча талабалар «Тадбиркорлик ва менежмент» ва «Ахборот технологиялари» йўналишларида таҳсил олади. Кузги семестердан нефть-газ, кимё, кончилик, электротехника, геология муҳандислиги каби йўналишларда ҳам талабалар қабули бошланиши режаланган.

Университетда асосан хорижлик профессор-ўқитувчилар СХТУ биринчи проректори италиялик профессор Жосеф Сапиенза (Joseph Sapienza), тиллар маркази директори Жанубий Африкалик профессор Аннамария Бассон (Annamarie Basson), ахборот технологиялари маркази директори ҳиндистонлик профессор Муҳаммад Гоус Галетий (Muhammad Gouse Galety), тайёрлов мактаби директори америкалик профессор, Иви Силверман (Ivy Silverman) ҳамда талабалар ишлари бўйича декан полшалик профессор Дорота Силвия Мажевицзл (Dorota Sylwia Majewiczl)лар таълим бериши ҳақида маълум қилинган.

Бундан ташқари, университетда Жанубий Кореялик профессор, Ипак йўли университетлар тармоғи директори Хванг Сунг Дон бошчилигида «Корея технология ва маданият коллежи» ташкил этилгани эълон қилинган.

Ўзбекистон ривожи учун юқори даражадаги техник мутахассислар, жумладан, энергетика ва нефть-газ саноати, кончилик, ахборот технологиялари каби давлат иқтисодиётининг асослари муҳимлигини ҳисобга олиб, Eriell Group бошқаруви раиси, университет ҳомийлар кенгаши раиси, Бахтиёр Фозилов имтиҳонларда энг юқори натижага эришган ва ижтимоий ёрдамга муҳтож жами 3 нафар талабага компания томонидан тегишли грант ажратган.

Эслатиб ўтамиз, 2022 йил 4 февраль – Самарқанд халқаро технология университети расман давлат рўйхатида қайд этилган ва юридик мақомга эга бўлган.

Аввалроқ Яҳё Ғуломов номидаги Самарқанд археология институти, Фарғонада халқаро институт ташкил этилиши, Бутунроссия давлат кинематография институтининг Тошкентдаги филиалида учта янги йўналиш очилиши тўғрисида хабар берилганди.