«Ўзбекнефтгаз» АЖ томонидан республика аҳолиси эҳтиёжларини сифатли автобензин билан таъминлаш мақсадида Бухоро нефтни қайта ишлаш заводида ишлаб чиқарилаётган маҳаллий маҳсулот билан бир қаторда, тайёр маҳсулотлар ҳам импорт қилинаётгани тўғрисида хабар берилганди. Компания матбуот хизматининг маълум қилишича, Россиянинг TONECO заводидан 50 минг тонна АИ-80 бензини олиб келинган.

Қайд этилишича, январь ойида «Татнефт» (Россия) компанияси томонидан ишлаб чиқарилган АИ-80-К-5 автобензинни импорт қилиш бўйича келишувга эришилиб, TONECO заводидан жами 50 минг тонна АИ-80-К-5 русумдаги автобензини юклаб берилган.

«АИ-80 автобензинга бўлаётган талабнинг ортиб бораётганини ҳисобга олиб, тақчиллик, узилишлар ва АЁҚШлардаги навбатларнинг олдини олиш мақсадида, 4 февраль кунидан бошлаб жамият тасарруфидаги АЁҚШлар орқали импорт қилинган АИ-80-К-5 русумли автобензин сотувга чиқарилди», — дейилади хабарда.

Товар-хомашё биржасида АИ-80 русумли автобензиннинг бошланғич нархи бир тоннаси учун 7 168,3 минг сўм, «Ўзбекнефтгаз» АЖга қарашли АЁҚШларда истеъмолчиларга сотиладиган якуний нархи бир литри учун 6 минг сўмни ташкил этмоқда.

Февраль ойида «Татнефт» компаниясидан қўшимча 50 минг тонна АИ-80 автобензини харид қилиниши режалаштирилган.

Маълумот учун, «Ўзбекнефтгаз» томонидан 2023 йил январь ойида «Газпром» компанияси томонидан ишлаб чиқарилган 5 минг тонна АИ-80-К-5 русумли автобензин харид қилиниб, АЁҚШлар орқали республика истеъмолчилари учун реализация қилинган.

Аввалроқ «Ўзбекнефтгаз» ижтимоий тармоқларда имиджига салбий таъсир қиладиган маълумотлар тарқатилгани, мақолалар тухмат, ташкилот раҳбари шахсини ҳақорат қилиш ва ташкилот имиджига путур етказишга ҳаракатлари кузатилаётгани ҳақида маълум қилганди.