Тошкент вилояти Юқори Чирчиқ туманида аҳолининг қорамолларини ўғирлаш билан шуғулланган бир гуруҳ шахслар қўлга олинди, деб хабар беради вилоят ИИББ ахборот хизмати.

Қайд этилишича, Юқори Чирчиқ тумани «Файзобод» маҳалласида яшовчи фуқаронинг ҳовлисидан 5 бош қўй номаълум шахслар томонидан ўғирлаб кетилган. Мазкур ҳолат шу вақтнинг ўзида ИИБ назоратига олиниб, суриштирув ишларига киришилган. Орадан 4 кун ўтиб, ушбу маҳалланинг «Қайтмас» кўчасида яшовчи яна бир фуқаро хонадонидан 4 бош қўй ва 2 бош бузоқ ўғирлангани ҳақида тезкор хабар олинган.

Ҳудудда ўтказилган ўрганишлар ва тезкор суриштирув тадбирлари давомида ушбу икки жиноятни 20-25 ёшлар орасидаги 6 нафар шахс содир этгани аниқланиб, улар процессуал тартибда ушланган.

Ҳолат юзасидан дастлабки тергов жараёнида, биринчи ҳолат бўйича фуқарога етказилган 15 миллион сўм моддий зарар ундириб берилишига эришилган бўлса, иккинчи ҳолатда ўғирланган 4 бош қўй ва 2 бош бузоқ жабрланувчига қайтарилиши таъминланган. Ҳозирда ушланган шахсларга нисбатан Жиноят кодексининг 169-моддаси (Ўғирлик) 3-қисми билан жиноят иши қўзғатилган.

Аввалроқ Тошкент шаҳар Янгиҳаёт туманида ўзганинг отларини ўғирлаган шахслар қўлга олинганди. Шунингдек, Сурхондарё вилояти Жарқўрғон туманида қорамол ўғриси ушлангани, Қирғизистондан Ўзбекистонга 34 бош қорамолни ноқонуний олиб ўтмоқчи бўлганлар қўлга олингани, Самарқандда Нехиаъда қорамол ўғирлаган йигитлар ушлангани тўғрисида хабар берилганди.