Андижон вилоятида 21 ёшли аёл юк машинаси уриб кетиши оқибатида вафот этди. «Milliy» телеканалининг «Миллар» дастурида хабар берилишича, воқеа 2 февраль куни соат 15:30 да Андижон тумани «Қоратут» маҳалласи ҳудудида содир бўлган. Аниқланишича, аёл киши йўлнинг белгиланмаган жойидан ўтаётган пайтида юк машинаси уни уриб юборган.

Натижада 21 аёл шошилинч равишда чап оёқ болдир қисми ва бош суягининг ёпиқ синиши тан жароҳати билан шифохонага олиб борилган. Бироқ кўрсатилган ёрдамга қарамасдан шифохонада вафот этган.

«Қайрилаётган вақтимда аёл кишининг бақирган овозини эшитиб қолдим. Тўхтаб қарасам йўлнинг белгиланмаган жойидан ўтаётган аёл кишини уриб юборган эканман. Натижада дарҳол уни тез тиббий ёрдамга олиб бордим», — дейди юк машинаси ҳайдовчиси.

Андижон вилояти ИИБ ЙҲХБ ходимининг сўзларига кўра, аёл киши уйига яқинроқ бўлгани сабабли ушбу автомобиль йўлини кесиб ўтаётган бўлган ҳамда юк машинаси ҳайдовчиси йўлни кесиб ўтаётган пиёдани кўрмай қолиши оқибатида ушбу ҳолат содир бўлган. Қайд этилишича, ҳозирда мазкур ҳолат юзасидан Андижон тумани Ички ишлар бошқармаси Тергов бўлинмаси томонидан терговга қадар текширув ҳаракатлари олиб борилмоқда.

Мавзуга доир: Қашқадарёда «КамАЗ» 9 ёшли қизни босиб кетди

Аввалроқ Тошкентда поезд 17 ёшли йигитни уриб юборгани ҳамда Самарқандда Isuzu ҳайдовчиси ҳамкасбини босиб кетгани ҳақида хабар берилганди.