АҚШ Шимолий қўмондонлигининг қирувчи самолётлари мамлакат ҳаво ҳудудида парвоз аниқланган Хитойнинг «жосус шари»ни уриб туширди, дея хабар бермоқда CNN. Операция бошланишидан аввал АҚШ Федерал авиация бошқармаси хавфсизлик нуқтайи назаридан учта аэропортни, жумладан ҳаво оқимлари хитойликлар шарини олиб кирган Жанубий Каролина штатидаги Миртл-Бич халқаро аэропортини ҳам ёпишга қарор қилди. Бундан ташқари, Жанубий Каролина соҳиллари яқинидаги ҳаво кенглиги ҳам фуқаролик парвозлари учун ёпиб қўйилди.

Шар Атлантика океанига қулаган, америкаликлар унинг қолдиқларини сувдан чиқариб олиб, ўрганиш учун топширишмоқчи. Пентагоннинг хабар беришича, АҚШ президенти Жо Байден 1 февраль куни Хитой шарини уриб туширишни буюрган, бироқ Мудофаа вазирлиги хавфсизлик нуқтаи назаридан ҳаво шари АҚШ ҳудудий сувлари устидан ўтишини кутган.

Мавзуга доир: АҚШ генерали қўл остидагиларни Хитой билан урушга тайёргарлик кўришга чақирди

АҚШ Ҳарбий департаментнинг таъкидлашича, ҳаво шари Хитой томонидан Қўшма Штатлардаги стратегик объектларни кузатиш учун ишлатилган. ХХР эса ҳаво шаридан метеорологик мақсадларда фойдаланилганини билдирган. Хитой Ташқи ишлар вазирлиги АҚШ томонидан учувчисиз ҳаво шарининг уриб туширилишига норозилик билдирди.

«Хитой текширувдан сўнг Америка томонини бир неча бор ҳаво шари фуқаролик мақсадларида фойдаланиш учун эканлигини ва форс-мажор ҳолатлари туфайли АҚШ [ҳаво бўшлиғига] кирганлиги тўғрисида огоҳлантирган, бу мутлақо кутилмаган ҳолат», — дейилади ТИВ баёнотида.

Шунингдек, дипломатларнинг қўшимча қилишича, Хитой кейинги зарур жавоблар бериш ҳуқуқини ўзида сақлаб қолади ҳамда ўзининг қонуний ҳуқуқ ва манфаатларини қатъий ҳимоя қилади.

Аввалроқ АҚШ Конгресси Вакиллар палатаси спикери Нэнси Пелосининг оролга ташрифи туфайли Хитой билан Ғарб муносабатлари ёмонлашган. Чунки Хитой томони бунга норозилик билдирган ва ҳарбий машғулотлар ўтказишни бошлаганди. Натижада АҚШ президенти Жо Байден Хитой Тайванга ҳужум уюштирадиган бўлса, Қўшма Штатлар оролни ҳимоя қилишга тайёр эканини билдирганди. Шундан сўнг, Си Цзиньпин Хитой Тайванга нисбатан куч ишлатиш ҳуқуқидан ҳеч қачон воз кечмаслигини маълум қилганди.