Ўзбекистон ташқи ишлар вазири вазифасини бажарувчи Бахтиёр Саидов Исроилнинг мамлакатдаги элчиси Зеҳавит Бен Ҳиллелни қабул қилди, дея хабар бермоқда «Дунё». Учрашувда Ўзбекистон-Исроил муносабатларининг ҳолати ва уларни янада ривожлантиришнинг устувор йўналишлари, шунингдек, БМТ ҳамда бошқа халқаро ташкилотлар доирасидаги ҳамкорлик масалалари муҳокама қилинди.

«Исроил Элчиси Зеҳавит Бен Ҳиллелни қабул қилдим. Икки томонлама муносабатларни мустаҳкамлашда Исроилнинг Тошкентдаги Элчихонасининг фаол ролини юқори баҳолаймиз. Ишончим комилки, 2023 йил қишлоқ хўжалиги, сув ресурсларини бошқариш, тиббиёт, таълим ва бошқа соҳаларда ўзаро манфаатли янги лойиҳаларга бой бўлади», — дейди Бахтиёр Саидов.

Шунингдек, икки давлат ўртасида савдо-иқтисодий ва инвестициявий алоқалар, шунингдек, инновация, тиббиёт, таълим ва туризм соҳаларидаги ҳамкорлик салоҳиятидан самарали фойдаланишга алоҳида эътибор қаратилди. Бундан ташқари, бўлажак мулоқотлар жадвали, ташкилий ва мазмунли жиҳатлари, шунингдек, Ўзбекистон ва Исроил Ташқи ишлар вазирликлари ўртасидаги маслаҳатлашувларнинг навбатдаги даврасини  ташкиллаштириш масалалари муҳокама қилинди.

Мавзуга доир: Ўзбекистоннинг Фаластин–Исроил можаросидаги позицияси маълум қилинди

Аввалроқ Ўзбекистон ва Исроил туризм соҳасида икки томонлама ҳамкорлик алоқаларини мустаҳкамлашга доир келишув имзолангани ҳақида хабар берилганди.