Ўзбекистон Туркияда рўй берган кучли зилзиладан жабр кўрганларга гуманитар ёрдам ҳамда табиий офат оқибатларини бартараф этишда иштирок этиш учун Фавқулодда вазиятлар вазирлигининг бир гуруҳ қутқарувчиларини жўнатади. Шавкат Мирзиёев бу борадаги тегишли топшириқни берган. Бу ҳақда Президент матбуот котиби маълум қилди.

Туркия президенти Ражаб Тоййиб Эрдўғоннинг сўзларига кўра, зилзила оқибатида ҳалок бўлганлар сони 912 кишини ташкил этмоқда, шунингдек, 5,4 мингга яқин инсон жабрланган. У мазкур зилзилани «сўнгги юз йилликдаги энг ҳалокатли» ер ости силкиниши деб атаган.

Аввалроқ Шавкат Мирзиёев Туркиянинг жануби-шарқий қисмидаги вилоятларда юз берган кучли зилзила оқибатида кўплаб одам қурбон бўлгани ва жиддий жароҳат олгани, катта талафотлар кўрилгани муносабати билан Туркия президенти Ражаб Тоййиб Эрдўғонга ҳамдардлик йўллаганди.

Ўзбекистон Ташқи ишлар вазирлиги эсаўз навбатида ҳолат юзасидан расмий баёнот берган. «6 февраль Тошкент вақти билан соат 11:00 ҳолатига кўра, мамлакатимизнинг Туркиядаги дипломатик ваколатхоналарига зилзила оқибатида ҳалок бўлган ва жароҳатланган Ўзбекистон фуқаролари бўйича маълумот келиб тушмади», — дейилади хабарда.