Россия яқин 10 кун ичида Украинада кенг кўламли ҳужумни бошлаши мумкин. Бу ҳақда The Financial Times кимлигини ошкор этмаган Украина армияси маслаҳатчисига таяниб хабар берди. Унга кўра, Киевда Россиянинг ҳужум бошлаши ниятида ҳақида «жуда муҳим маълумот» мавжуд.

Таҳлилчиларга кўра, Луганск вилоятининг ғарбий қисмидаги Кременна ва Лиман туманлари ҳужумнинг янги нишонига айланиши мумкин — ушбу ҳудудлар 2022 йил кузда украин қўшинларининг контрҳужумлари давомида қайтариб олинганди. Россия бир неча ҳафтадан бери у ерда ўз қўшинларини тўпламоқда.

Украина президенти Владимир Зеленский 5 февраль кунги мурожаатида россияликлар февраль ойида «ўтган йилги мағлубиятлари давомида қўлдан чиқарган ҳудудларини қайтариб олишга» уриниши ҳақида кўплаб маълумотлар борлигини қайд этган. «Донецк вилоятида вазият жуда оғир — қақшаткич жанглар давом этмоқда. Қанчалик ўғир ва қанақа босим бўлмасин, биз бардош беришимиз керак», — дейди президент.

Украина мудофаа вазири Алексей Резников 5 февраль кунги матбуот анжуманида Киев кенг кўламли босқин бошланганига бир йил тўлиши муносабати билан россияликлардан эҳтимолий ҳужумларни кутаётганини, чунки «улар [руслар] рамзийликни яхши кўришини» айтган.

Украина разведкаси вакили Андрей Черняк 2 февраль куни Россия президенти Владимир Путин Донецк ва Луганск вилоятлари ҳудудларини мартга қадар тўлиқ эгаллаш бўйича буйруқ берганини маълум қилганди.

Аввалроқ АҚШ президенти Жо Байден январь ойида МРБ бошлиғи Уильям Бернсга Россия ва Украина тинчлик музокараларини ўтказишга қанчалик тайёрлигини баҳолашни топширгани маълум бўлганди. Москва ва Киевнинг бу борадаги жавоблари Ғарб давлатларининг Украинага танкларни етказиб бериш қарорини маъқуллашига сабаб бўлган. Бернс Киевга «ер эвазига тинчлик», Москвага эса «тинчлик эвазига ер» таклифлари билдирилган. Суҳбатдошларнинг сўзларига кўра, «ер» деганда Украинанинг 20 фоизга яқин ҳудуди назарда тутилган, бу Донбасс майдонида тенг демакдир (Донецк ва Луганск Халқ Республикалари 2022 йил кузда референдумлар натижаси бўйича Россия таркибига қўшилганди). Иккала томон ҳам таклифларни рад этган.