Наманганда газ портлаши оқибатида уй қулаб тушди — фото
Наманган вилояти Косонсой тумани «Нуробод» МФЙда жойлашган хонадонда газ портлади. Бу ҳақда Фавқулодда вазиятлар вазирлиги матбуот хизмати хабар берди.
Қайд этилишича, 7 февраль куни соат 07:30 ларда Косонсой тумани «Нуробод» МФЙ Навбаҳор кўчаси рақамсиз яшаш уйида газ-ҳаво аралашмасининг чақнаши содир бўлган. Чақнаш оқибатида 4 нафар фуқаро тан жароҳатини олиб, туман тиббиёт бирлашмасига ётқизилган.
Маълум қилинишича, айни вақтда чақнаш оқибатлари бартараф этилмоқда. Воқеа жойига ФВБ, ИИБ, ССБ, прокуратура ҳамда «Ҳудудгазтаъминоти» ходимлари жалб этилган.
Аввалроқ Қорақалпоғистоннинг Нукус шаҳридаги кўп қаватли уйларнинг бирида газ портлаши оқибатида ҳалок бўлганлар сони 5 нафарга етгани, шунингдек, Сурхондарёда лицей қозонхонаси портлаши оқибатида икки киши ҳалок бўлгани ҳақида хабар берилганди.
Мавзуга доир: Термиздаги хонадонда портлаш содир бўлди
Эслатиб ўтамиз, декабрь ойида Андижон шаҳридаги кўп қаватли уйларнинг бирида газ чақнаши оқибатида портлаш содир бўлган, Фарғонадаги уйда газ портлаши оқибатида бир киши ҳалок бўлган, Термиздаги хонадонда портлаш юз берганди.
