Наманган вилояти Косонсой тумани «Нуробод» МФЙда жойлашган хонадонда газ портлагани тўғрисида хабар берилганди. Бош прокуратура матбуот хизмати бошлиғи Ҳаёт Шамсутдиновнинг маълум қилишича, ҳодиса оқибатида бир киши вафот этган.

7 февраль куни соат 07:30 ларда Косонсой тумани «Нуробод» МФЙ Навбаҳор кўчаси рақамсиз яшаш уйида газ-ҳаво аралашмасининг чақнаши содир бўлган. Чақнаш оқибатида 4 нафар фуқаро тан жароҳатини олиб, туман тиббиёт бирлашмасига ётқизилган. Шамсутдиновга кўра, кўнгилсиз ҳодиса натижада жароҳат олганлар сони 5 кишини ташкил этган.

Кўрсатилган тез-тиббий муолажаларга қарамасдан 1 нафари шифохонада вафот этган.

Мазкур ҳолат юзасидан Косонсой туман прокуратураси томонидан Жиноят кодексининг 258-моддаси 2-қисми «а» банди (Тоғ-кон, қурилиш ёки портлатиш ишлари хавфсизлиги қоидаларини бузиш) билан жиноят иши қўзғатилган. Ҳозирда тергов ҳаракатлари олиб борилмоқда.

Аввалроқ Қорақалпоғистоннинг Нукус шаҳридаги кўп қаватли уйларнинг бирида газ портлаши оқибатида ҳалок бўлганлар сони 5 нафарга етгани, шунингдек, Сурхондарёда лицей қозонхонаси портлаши оқибатида икки киши ҳалок бўлгани ҳақида хабар берилганди.