Туркия жануби-шарқида 6 февраль тонгида содир бўлган ҳалокатли зилзила сабаб мамлакатда етти кунлик умуммиллий мотам эълон қилинди, деб хабар беради Anadolu агентлиги. Президент Ражаб Тоййиб Эрдўғон бу борадаги тегишли қарорни қабул қилган.

Туркиядаги ва мамлакатнинг хориждаги барча ваколатхоналаридаги давлат пайроқлари 12 февралга қадар туширилади.

Туркияда табиий офат қурбонлари сони 2921 кишига етган, 15 834 киши жароҳат олган.

Туркия ҳукумати ҳузуридаги Фавқулодда вазиятларнинг олдини олиш ва оқибатларини бартараф этиш бошқармаси (AFAD) маълумотларига кўра, Маръаш, Килис, Диёрбакир, Адана, Османия, Газиантеп, Шонлиурфа, Адияман, Малатья ва Хатайда 5606 та бино вайрон бўлган.

Туркия ҳукумати такрорий ер ости силкинишлари хавфи сабаб аҳоли уйларига қайтмасликка чақирган.

Туркия вице-президенти Фуат Октайнинг маълум қилишича, вайроналар остидан ҳозирча 7 840 кишини қутқариб олишга муваффақ бўлинган. Октайнинг қўшимча қилишича, 338 минг киши ётоқхоналар ва университетларга жойлаштирилган.

Туркия жануби-шарқида 6 февраль тонгида 7,4 магнитудали зилзила содир бўлди. Зилзила мамлакатдаги 10 та шаҳарни, шунингдек, қўшни Суриянинг қатор ҳудудлари вайрон қилди. Al-Jazeera телеканалига кўра, Сурияда ҳалок бўлганлар сони 1444 кишини ташкил этмоқда.

Шавкат Мирзиёев Туркия президенти Ражаб Тоййиб Эрдўғонга ҳамдардлик билдирди. Шунингдек, Туркияда зилзила оқибатларини бартараф қилиши учун Ўзбекистон қутқарувчиларни юбориши ҳақида маълум қилинганди.