Хайрли кеч, ушбу ўқиб турганингиз — «Бугун»нинг энг сара ва муҳим хабарлари жой олган «Бугун оқшоми» дайжести.

Ўзбекистонда Туркия учун гуманитар ёрдам йиғиш бошланди

Туркия жануби-шарқида 6 февраль куни эрталаб содир бўлган 7,8 балли зилзила оқибатида мамлакатда ҳалок бўлганлар сони айни пайтга келиб 9 минг кишидан, жароҳатланганлар сони эса 50 минг нафардан ошди. Шунингдек, ер ости силкинишлари оқибатида Сурия шимолида ҳалок бўлганлар сони 2,5 минг кишига етган. Ҳозирда Туркиядаги ҳалокат ўчоқларида 100 мингга яқин қутқарувчилар ишламоқда. Улар орасида кўнгиллилар ва бошқа мамлакатлардан, жумладан, Ўзбекистондан келган мутахассислар ҳам бор.

Шавкат Мирзиёев топшириғи билан Туркияга етиб борган ФВВ қутқарувчилари томонидан зилзила оқибатида вайрон бўлган бинолар остидан 8 февраль куни 9 киши тирик ҳолда қутқарилди ҳамда 15 кишининг жасади олиб чиқилди. Шунингдек, аввалроқ бедарак йўқолгани айтилган 15 нафар Ўзбекистон фуқаросидан бир нафари тирик ҳолда топилган. 

Бундан ташқари, зилзила оқибатларини бартараф этиш ҳамда жабрланганлар ёрдам кўрсатиш мақсадида дунёнинг 100 га яқин мамлакатлари орасида Ўзбекистон ҳам Туркияга инсонпарварлик ёрдамини юбормоқда.

Хусусан, Тошкентда ҳамда республиканинг бир қатор ҳудудларида Ўзбекистон Савдо-саноат палатаси ҳамда «Ёшлар — келажагимиз» жамғармаси томонидан кучли зилзила оқибатида талафот кўрган Туркияга Ўзбекистон номидан инсонпарварлик ёрдами ташкил қилинмоқда.

Хўш, Ўзбекистонни ўзида нималар содир бўлди?

Қурилиш вазирлиги мутасаддиси Ўзбекистондаги биноларнинг сейсмик чидамлигига кафолат бера олмаслигини маълум қилди

Қурилиш ва уй-жой коммунал хўжалиги вазирининг биринчи ўринбосари Даврон Одилов Ўзбекистонда қурилаётган объектларга буюртмачилар масъул эканини таъкидлаб, кафолатчи қурилишдаги буюртмачи, яъни объектнинг эгаси ҳисобланишини айтиб ўтди.

Журналистлар учун ташкил этилган матбуот анжуманида «Ўзбекистонда қурилаётган уйлар учун неччи балли зилзилага ‘гарантия’ бера оласиз» мазмунидаги саволларга вазир ўринбосари «бу ерда инсон омили бор, мен 36 миллион одамнинг қилаётган иши учун кафолат бера олмайман. Кафолатни давлат тарафидан, ўрнатилган назорат, жорий қилинган тартиб-қоида ва стандартлар борасида бера оламан», дея жавоб қайтарган. Қонунчиликда қайд этилишича, лойиҳа ташкилотлари томонидан қурилишлар ҳудуднинг белгиланган сейсмик балига кўра (7, 8, 9 ) режалаштирилган ҳолда лойиҳалаштирилади.

Ўзбекистон Туркманистондан етказилмаган газ учун пул компенсацияси талаб қилдими?

Аномал совуқ сабаб Туркманистондан Ўзбекистонга газ етказиб беришнинг тўхтатилиши оқибатида 59,7 млн доллар зарарни қоплаш мақсадида Ўзбекистон ҳукумати Туркманистондан пул компенсацияси талаб қилгани рад этилди. Энергетика вазирлигининг таъкидлашича, Туркманистондан етказилиб берилган суюлтирилган газ партияси Ўзбекистонга дўстона ва биродарлик билан қўллаб-қувватлаш мақсадида бепул тақдим этилган.

Бундан ташқари, Энергетика вазирлиги Туркманистон томонидан тақдим этилган суюлтирилган газ яқин кунларда эҳтиёжманд оилаларга бепул тарқатилишини қўшимча қилди. Аввалроқ туркман нашрлари Ўзбекистон томони газ етказиб берилишида узилиш бўлгани учун Туркманистондан катта миқдорда пул компенсацияси талаб қилгани ҳақида хабар тарқатганди. Бироқ музокаралардан сўнг, Ўзбекистон томони етказилган зарар миқдорида суюлтирилган газ олишга рози бўлган. Туркманистон расмий матбуотида эса ушбу ҳолат газнинг бепул берилиши «қўшни давлатга дўстона ва биродарлик ёрдами» сифатида талқин этилган.

Шавкат Мирзиёев янги қурилган ерусти метросини бориб кўрди

Бугунги кунда Тошкент ерусти метросининг биринчи босқичи ва Сергели йўналишини боғловчи Қўйлиқдан Сергелигача бўлган ерусти йўли барпо этилмоқда. Қарийб 12 километрлик бу қисмда 7 та бекат бўлади. Ҳозирда Қурувчилар даҳасигача борган 5 та бекати қуриб битказилган. Шавкат Мирзиёев 8 февраль куни Тошкент ерусти метроси қурилишининг иккинчи босқичида амалга оширилаётган ишлар билан танишди.

Президент жамоатчилик вакиллари билан бирга метрода юрди. Маълум қилинишича, Қурувчилар даҳасидан Қипчоқ бекатигача бўлган қарийб 4 километрлик метро йўли ҳам яқин ойларда ишга туширилади. Шу тариқа, Қўйлиқ ва Сергели орасидаги қатнов вақти 15 дақиқани ташкил этади. Аввалроқ Шавкат Мирзиёевга маълумот берилган метрополитен инфратузилмасини ривожлантириш бўйича тақдимотда йерусти метросининг иккинчи босқичи доирасидаги бешта бекат 2022 йил якунигача ишга туширилиши маълум қилинганди.

Бундан ташқари шу кунни ўзида давлат раҳбари Тошкент шаҳридаги «Aysel Energy» корхонаси фаолияти билан танишди ҳамда Тошкент шаҳрининг Сергели туманидаги маҳаллага бориб, фуқаролар билан суҳбатлашди.

Президент аҳоли томонидан ишлаб чиқарилган электр энергияси давлат томонидан сотиб олиниши кафолатланишини ҳамда Тошкент шаҳрида янги қурилишларга чеклов ўрнатилишини маълум қилди

Шавкат Мирзиёев Сергелийда аҳоли вакиллари билан суҳбатлашгандан кейин пойтахт жамоатчилик вакиллари ва мутасаддилар иштирокида йиғилиш ўтказди. Йиғилишда аолининг ўз хонадонига ўрнатган панел ёрдамида ишлаб чиқарилган электр энергиясининг ҳар бир киловати давлат томонидан минг сўмдан сотиб олиниши маълум қилинди. Президентнинг сўзларига кўра, маблағлар хонадон эгасининг пластик картасига ўтказиб берилади.

Қайд этилишича, панель ўрнатган тадбиркорлар ишлаб чиқарган электрни давлат кафолатли сотиб олади. Кейинги йилдан эса бошқа истеъмолчиларга ҳам сотиши мумкин бўлади. Бундан ташқари, Тошкентда қайта тикланувчи энергияни жорий қилиш учун 1 миллиард доллар ажратилади. Шунингдек, Шавкат Мирзиёев Тошкент шаҳирда бош режа бўлмагунча, янги қурилишларга мораторий эълон қилинишини маълум қилди.

Пул билан боғлиқ бошқа хабарлар:

• Орол денгизининг қуриган тубида 100 минг гектар майдонда «яшил қопламалар» барпо этилади;
• Хитойнинг энг йирик автомобиль компанияларидан бири Geely 2023 йил Ўзбекистонда фаолиятини бошламоқчи;
• Тошкент ер ости метро бекатларида мижозларига хизмат кўрсатувчи алоқа операторлари сони биттага кўпайди;
• Россиянинг Ural Airlines авиакомпанияси Екатеринбургдан Ўзбекистоннинг олти шаҳрига парвозларни амалга оширишга рухсат олди.

Оламда яна нима гап?

АҚШ президенти Украинани қўллаб-қувватлашда давом этишини маълум қилди

АҚШ президенти Жо Байден мамлакат Конгрессига йўллаган йиллик мурожаатида президентлик даврида ўз администрацияси томонидан эришилган ютуқлар билан «мақтанди». Унинг таъкидлашича, у давлат раҳбари сифатида 2 йиллик фаолияти давомида ҳам республикачилар, ҳам демократлар томонидан ишлаб чиқилган 300 дан ортиқ ҳужжатга имзо чеккан. Қизиғи улар орасида АҚШда бир жинслилар никоҳини федерал даражада тан олиш тўғрисидаги қарор ҳам мавжуд.

Шунингдек, у ўз нуқтида АҚШ Хитой билан ҳар томонлама рақобатга тайёрлигини ҳам билдирган ҳамда «Путин уруши», «Путин босқини» ва «Путин агрессияси», дея Путтини «эслашига» қарамасдан 73 дақиқалик нуқти давомидан бирор марта ҳам Россия сўзини ишлатмаган. «Биз НАТОни бирлаштирдик ва глобал коалицияни туздик. Биз Путин босқинига қарши чиқдик. Биз украин халқига елкадош бўлди», — дейди Байден.

Бугун билан яшанг. «Бугун»да қолинг.