АҚШ президенти Жо Байден 7 февраль куни кечаси мамлакатдаги вазият бўйича Конгрессга мурожаат қилди, деб хабар беради Оқ уй матбуот хизмати.

Қайд этилишича, 73 дақиқа давом этган чиқиши давомида Байден ўз администрацияси эришган ютуқларни эслатиб ўтган, масалан, унинг президентлигини 2 йилида АҚШда коронавирус пандемияси фонида «рекорд даражада 12 миллион ишчи ўрни» яратилган. АҚШ президенти «ковид эндиликда ҳаётимизни назорат қилмаётганини» айтиб, «АҚШ — инқироздан чиқиб кетаётган ягона давлат» эканини таъкидлаган.

Байден ўз чиқишининг бир қисмини АҚШдаги икки партияли тизимга бағишлаган. Унинг таъкидлашича, президентлик лавозимидаги икки йиллик ишлари давомида ҳам республикачилар, ҳам демократлар томонидан ишлаб чиқилган 300 дан ортиқ ҳужжатга имзо чеккан. Улра орасида АҚШда бир жинслилар никоҳини федерал даражада тан олиш тўғрисида ҳамда Украинага ҳарбий ёрдам кўрсатиш бўйича қонунлар бор. Жо Байден демократлар ва республикачилар биргаликда ишлаши муминлигини қайд этилиб, Республикачилар партияси лойиҳаларини қўллаб-қувватлашга ваъда берди.

Байденнинг чиқиши давомида республикачилар бир неча бор унинг гапларини бўлган. Демократ Байден 2022 йил ноябрь ойида Республикачилар партияси оралиқ сайловларда Вакиллар паласида аксарият овозларни қўлга киритганидан кейин Конгрессга биринчи марта мурожаат йўллади.

Шунингдек, Жо Байден бир вақтнинг ўзида Хитой билан ҳам рақобатга, ҳам ҳамкорликка тайёр эканини билдирган. «Адашманглар: ўтган ҳафта айтганимиздек, агарда Хитой бизнинг суверенитетимизга таҳдид қилса, биз юртимизни ҳимоя қилиш учун ҳаракат қиламиз. Ва биз буни амалга оширганмиз», — дейди АҚШ президенти. 4 февраль куни АҚШ ҳарбийлари Хитой аэростатини уриб туширганди. Пентагон версияси бўйича у разведка маълумотларини тўплаган, Хитой эса у метеорологик маълумотлар билан ишлаганини айтган.

Жо Байден ўз нутқининг якунида 2022 йилда ҳам «Владимир Путин ноинсофларча Украинага қарши уруш эълон қилганидан бир неча кун ўтиб» Конгрессга худди шу каби мурожаат билан чиққани эслатиб ўтган.

«Иккинчи жаҳон уруши даврида Европадаги ўлим ва ҳалокат тасвирларини уйғотадиган даҳшатли ҳужум. Путиннинг босқини асрлар синовига айланди. Америка учун, бутун дунё учун синовга айланди», — дейди Байден.

АҚШ президентининг таъкидлашича, Россия босқини бошланган бир йил давомида Америка ҳукумати «Путин агрессияси» қарши чиқиш қилган ва Украинани қўллаб-қувватлаган. Ўз чиқиши давомида Байден бу вақтда залда ўтирган Украинанинг АҚШдаги элчиси Оксана Маркаровага мурожаат қилган. Йиғилганлар уни қарсак билан кутиб олган.

«Биз НАТОни бирлаштирдик ва глобал коалицияни туздик. Биз Путин босқинига қарши чиқдик. Биз украин халқига елкадош бўлди. Ва бугун биз билан Украинанинг Қўшма Штатлардаги элчиси турибди. У нафақат ўз мамлакати, балки бутун халқининг жасоратини намоён этмоқда. Ҳурматли элчи, Америка сизнинг мамлакатингизни қўллаб-қувватлашда бирлашди. Қанча талаб этилса, шунча ёнингизда турамиз», — дейди Жо Байден.

Ўз чиқиши давомида Байден Россияни бирор марта тилга олмаган, аммо «Путин уруши», «Путин босқини» ва «Путин агрессияси» ҳақида гапирган. Байден Россия президенти фамилиясини тўрт марта санаб ўтган. «РИА Новости» агентлигининг қайд этишича, ўтган йилги чиқиши давомида Байден Путинни 30 маротаба тилган олганди.

Эслатиб ўтамиз, декабрь охирларида АҚШ Украинага 1,85 млрд долларлик янги ёрдам пакетини расман эълон қилганди. Шунингдек, январь бошларида Донецкдаги «ПТУ»га берилган ракета зарбалари оқибатида камида 63 нафар россиялик ҳалок бўлгани, АҚШ Украинага Стрйкер зирҳли транспортёрларини етказиб бериши маълум бўлган.

Шу билан бирга, АҚШ президенти Украинага 31 та Abrams танкларини етказиб беришини эълон қилганди. Кейинроқ Байден Украинага жўнатилиши айтилган 31 та Abrams M1A2 танклари камида 2023 йил охирларида Киевга етказиб берилишини айтганди. Байденнинг сўзларига кўра, ушбу танклар Украина Қуролли Кучларига «очиқ майдонда яхшироқ манёвр қилишига» ёрдам беради. АҚШ президенти, шунингдек, Германияга Киев учун Leopard танкларини беришга қарор қилгани учун миннатдорчилик билдирган. Унинг таъкидлашича, бу яна бир бор Украина иттифоқчиларининг бирдамлигини ҳамда Россиянинг уларни бўлиб юборишга бўлган уриниши фойдасиз эканини кўрсатган.