Орол денгизининг суви қуриган тубида 2023 йилда 100 минг гектар майдонда «яшил қопламалар» — ҳимоя ўрмонзорлари барпо этилади, бунинг учун 25 миллиард сўм йўналтирилади. Бу ҳақда Ўрмон хўжалиги агентлиги хабар берди.

Қайд этилишича, 2022 йилда 107 минг гектар майдонда саксовул ва бошқа чўл ўсимликларидан «яшил қопламалар» барпо этилган. Жами 590,3 тонна, шундан 391 тонна маҳаллий аҳоли томонидан чўл ўсимликларининг уруғлари жамғарилган, 100 гектар саксовул ва бошқа чўл ўсимликларидан ниҳолхоналар ташкил этилди ҳамда 635 нафар ишчи-ходимлар, 250 дона юқори унумли тракторлар ва 2 дона кичик авиация (АН-2) жалб этилган.

«Ушбу барпо этилган ‘яшил қопламалар’ соҳа олимлари доимий мониторинг қилиниб, чўл ўсимликларининг кўкариши бўйича яхши натижаларга эришилмоқда», — дейилади хабарда.

2023 йилда 100 минг гектар майдонда «яшил қопламалар» ҳимоя ўрмонзорлари барпо этилади. Ушбу «яшил қопламалар»ни барпо этиш ва хатосини тўлдириш учун жами 420 тонна саксовул, қандим, қорабуроқ каби чўл ўсимликларининг уруғларини жамғарилади. 100 гектар майдонда саксовул ва бошқа чўл ўсимликларидан ниҳолхоналар ташкил этилади.

Молиялаштириш манбаалари бўйича Экология, атроф муҳитни муҳофаза қилиш ва чиқиндилар билан боғлиқ ишларни амалга ошириш жамғармасидан 5 миллиард сўм, Ўрмон хўжалигини ривожлантириш жамғармасидан 5 миллиард сўм, Акциядорлик тижорат банкларидан 5 миллиард сўм, Қорақалпоғистон Республикаси республика бюджетининг ошириб бажарилган қисми ҳисобидан 10 миллиард сўм ажратилади. Бундан ташқари, ўтган йиллардаги мавжуд қарздорликлар учун Вазирлар Маҳкамасининг захира жамғармасидан 5,5 миллиард сўм мақсадли маблағларни ажратилиши кўзда тутилмоқда.

Аввалроқ Владимир Норов Вашингтонда Оролбўйи минтақаси учун маблағ йиғиш хайрия тадбирида қатнашгани, ОТБ Оролбўйи ҳавзасида амалга ошириладиган лойиҳaга 150 миллион доллар ажратиши, Оролбўйи минтақаси экологик инновациялар ва экотуризм зонасига айлантирилиши тўғрисида хабар берилганди.

Эслатиб ўтамиз, Шавкат Мирзиёев 2022 йил 23 февраль куни Орол денгизининг қуриган жойига бориб, вазиятни кўргандиОрол денгизининг қуриган тубидан миллионлаб тонна чанг ва заҳарли тузлар кўтарилиб, катта ҳудудга тарқалар эди. Давлат раҳбари 2018 йили Мўйноққа ташрифи чоғида олимлар билан маслаҳатлашиб, у ерда шўрга чидамли ўсимликлар экиш вазифасини белгилаган эди.