Туркманистондан газ етказиб берилишида узилиш бўлгани учун Ўзбекистон катта миқдорда пул компенсацияси талаб қилгани ҳақидаги хабар асоссиз. Бу ҳақда Энергетика вазирлиги маълум қилди.

Ижтимоий тармоқларда Туркманистон газ конида носозлик сабабли январь ойининг маълум кунларида етказиб берилмаган газ учун Ўзбекистон томони Туркманистондан катта миқдорда компенсация пули талаб қилгани мазмунида хабарлар тарқалди.

Ўзбекистон Энергетика вазирлиги ушбу хабарлар ҳеч қандай асосга эга эмаслиги ва мутлақо ҳақиқатга тўғри келмаслигини маълум қилди ҳамда фуқаролардан бу каби тасдиқланмаган хабарларга ишонмасликни сўради.

«Шуни алоҳида таъкидлаймизки, Туркманистон томонидан Ўзбекистонга дўстона ва биродарлик билан қўллаб-қувватлаш мақсадида суюлтирилган газ партияси бепул тақдим этилди. Ўз навбатида, Туркманистон томонидан тақдим этилган суюлтирилган газ яқин кунларда эҳтиёжманд оилаларга бепул тарқатилади», — дейилади хабарда.

Turkmen.news порталининг хабар беришича, Ўзбекистон томони газ етказиб берилишида узилиш бўлгани учун Туркманистондан катта миқдорда пул компенсацияси талаб қилган. Бироқ музокаралардан сўнг, Ўзбекистон томони етказилган зарар миқдорида суюлтирилган газ олишга рози бўлган. Туркманистон расмий матбуотида суюлтирилган газнинг бепул берилиши «қўшни давлатга дўстона ва биродарлик ёрдами» сифатида тақдим этилган. Манбанинг қайд этишича, Туркманистон томони Ўзбекистондан бу ҳаракатларга изоҳ бермасликни сўраган.

Эслатиб ўтамиз, аномал совуқ туфайли 12 январда қўшни мамлакатнинг табиий газ қазиб чиқариш конларида юзага келган авариявий ҳолат табиий газ импортининг тўлиқ тўхташига ва боз устига электр энергияси импортининг 20 фоизга қисқаришига сабаб бўлганди. Туркманистондаги энг йирик «Галқиниш» газ конида юз берган авария ва Ўзбекистонга газ етказиб беришнинг тўхтаб қолишида айбдор деб топилган мансабдор шахслар ҳибсга олинган.