Ўзбекистон ФВВ бўлинмалари ходимлари Туркияга етиб борди. «Ўзбекистон 24» телеканининг «Янгиликлар 24» дастурида маълум қилинишича, 8 февраль соат 08:00 ҳолатига кўра, улар вайроналар остидан турли тан жароҳатлари олган 9 кишини қутқариб олган.

Чиқариб олинганларнинг 5 нафари эркак ва 4 нафари аёл. Бундан ташқари, 12 кишининг жасади олиб чиқилди. Жараён давомида 132 метр квадрат майдонда 430 метр куб вайроналар тозаланди.

Хабарда қайд этилишича, қидирув-қутқарув ишлари куну тун давом этмоқда.

Сўнгги маълумотларга кўра, Туркияда 6-7 февраль кунлари содир бўлган зилзилалар қурбонлари сони 6 мингга яқинлашди. Жароҳат олганлар сони қарийб 35 минг кишини ташкил этмоқда. Ер ости силкинишларидан жабр кўрган Сурия шимолида ҳалок бўлганлар сони 1832 кишига етган.

Эслатиб ўтамиз, Шавкат Мирзиёев Туркия президенти Ражаб Тоййиб Эрдўғонга ҳамдардлик билдирганди. Шунингдек, Туркияда зилзила оқибатларини бартараф қилиши учун Ўзбекистон қутқарувчиларни юбориши ҳақида маълум қилинган.