Туркияда 6-7 февраль кунлари содир бўлган зилзилалар қурбонлари сони 6 мингга яқинлашди. Жароҳат олганлар сони қарийб 35 минг кишини ташкил этмоқда. Бу ҳақда мамлакат вице-президенти Фуат Октайга таяниб, Anadolu хабар берди.

«5894 нафар юртдошимиз ҳалок бўлди… Жароҳат олганлар — 34 810 кишини ташкил этмоқда. Вайрон бўлган бинолар сонида ўзгариш йўқ — 5775 та. Вайроналар остидан 8 мингга яқин инсон қутқариб олинганини маълум қилдик», — дейди у.

Ер ости силкинишларидан жабр кўрган Сурия шимолида ҳалок бўлганлар сони 1832 кишига етган.

Магнитудаси 7,7 га тенг зилзила Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатли ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.

Давлат раҳбари зилзиладан жабр кўрган туманларда фавқулодда ҳолат режими жорий этилган. Октайнинг сўзларига кўра, вайрон бўлган ҳудудларда 16 мингдан ортиқ қутқарувчилар бригадалари ёки 60 мингдан зиёд қутқарувчи ишламоқда. Хориж давлатлари жами 3 мингга яқин мутахассис юборган. Хусусан, Ўзбекистон ҳам Фавқулодда вазиятлар вазирлигининг бир гуруҳ қутқарувчиларини жўнатган. Туркия президенти Ражаб Тоййиб Эрдўғон ҳалок бўлганлар хотирасига мамлакатда 7 кунлик мотам эълон қилди.

Эслатиб ўтамиз, Шавкат Мирзиёев Туркия президенти Ражаб Тоййиб Эрдўғонга ҳамдардлик билдирганди. Шунингдек, Туркияда зилзила оқибатларини бартараф қилиши учун Ўзбекистон қутқарувчиларни юбориши ҳақида маълум қилинган.