Буюк Британия ҳукумати Украинага ҳарбий техникалар етказиб берилишини тезлаштиради. Бу ҳақда мамлакат бош вазири Риши Сунак президент Владимир Зеленский билан ўтказган қўшма матбуот анжуманида маълум қилди, деб ёзади BBC News.

Сунакнинг сўзларига кўра, Британиянинг Challenger 2 танклари Украинага март ойида етказилади. Бош вазирнинг қайд этилишича, ўтган ҳафта Буюк Британияга тажриба ошириш учун келган 10 минг украин ҳарбий хизматчилари Украина ҳудудини ҳимоя қилишда «кейинги ойдан» Challenger 2 танкларидан фойдаланади.

Матбуот анжумани олдидан Сунак ва Зеленский украин ҳарбийлари малака ошираётган Англия жанубидаги Дорсет графлигида жойлашган ҳарбий базага ташриф буюрди.

Аввалроқ Буюк Британия Украинага қирувчи самолётлар бериш имкониятини ҳам кўриб чиқаётгани тўғрисида хабар берилганди. Британия ҳукумати раҳбари мамлакат мудофаа вазири Бен Уоллесга Украинага қандай самолётларни етказиб бериш имкони борлигини аниқлашни топширган. Шу билан бирга, Сунакнинг таъкидлашича, етказиб беришлар бўйича якуний қарор қабул қилинмаган, аммо Британия ҳукумати бундай имкониятни «фаол кўриб чиқмоқда».

Владимир Зеленский 8 февраль куни Буюк Британияга келди. У қирол Карл III билан учрашиб, Буюк Британия парламенти қаршисида чиқиш қилди. Бу Россиянинг Украинада кенг кўламли босқинчилик ҳаракатларини бошлаганидан бери хорижга иккинчи сафари ҳисобланади. 2022 йил декабрида у АҚШга борганди. Маълумотларга кўра, Буюк Британиядан кейин Зеленский Францияга боради, 9 февраль куни эса Европарламентнинг Брюсселдаги махсус сессиясида иштирок этади. Шунингдек, у Европа Иттифоқи давлатлари етакчиларининг саммитига таклиф этилган.

Эслатиб ўтамиз, февраль бошларида АҚШ президенти Жо Байден январь ойида МРБ бошлиғи Уильям Бернсга Россия ва Украина тинчлик музокараларини ўтказишга қанчалик тайёрлигини баҳолашни топширгани маълум бўлганди. Шунингдек, Россия яқин 10 кун ичида Украинада кенг кўламли ҳужумни бошлаши мумкинлиги айтилган, АҚШ президенти Украинага 31 та Abrams танкларини етказиб беришини эълон қилганди. Кейинроқ Байден Украинага жўнатилиши айтилган 31 та Abrams M1A2 танклари камида 2023 йил охирларида Киевга етказиб берилишини айтганди. Байденнинг сўзларига кўра, ушбу танклар Украина Қуролли Кучларига «очиқ майдонда яхшироқ манёвр қилишига» ёрдам беради. АҚШ президенти, шунингдек, Германияга Киев учун Leopard танкларини беришга қарор қилгани учун миннатдорчилик билдирган. Унинг таъкидлашича, бу яна бир бор Украина иттифоқчиларининг бирдамлигини ҳамда Россиянинг уларни бўлиб юборишга бўлган уриниши фойдасиз эканини кўрсатган.