Андижонда Қирғизистонга олиб ўтувчи иккита ноқонуний ер ости йўли топилди — видео
Туннеларнинг ҳар бирини баландлиги 1,5 метрни, узунлиги эса 150-200 метрни ташкил этади
Андижон вилоятининг Қўрғонтепа туманида Қирғизистондан ноқонуний олиб ўтувчи ер ости йўллари аниқланди.
Қайд этилишича, 3-9 февраль кунлари Ўзбекистон Давлат хавфсизлик хизмати ва Ички ишлар вазирлиги томонидан тезкор тадбирлар олиб борилган. Унда Ўш вилояти Қора-Суу тумани ҳудудидан Ўзбекистон давлат чегараси орқали Андижон вилояти Қўрғонтепа тумани ҳудудига олиб кирувчи, ҳар бирининг эни 60 сантиметр, баландлиги 1,5 метр, узунлиги тахминан 150-200 метрли иккита ер ости йўллари мавжудлиги аниқланган.
Ҳозирги вақтда, ушбу ҳолатлар юзасидан Жиноят кодексининг 223-моддаси (Қонунга хилоф равишда чет элга чиқиш ёки Ўзбекистон Республикасига кириш) билан қўзғатилган жиноят иши доирасида суриштирув ишлари олиб борилмоқда.
Аввалроқ 20 май куни ҳам Ўш вилояти Қорасув тумани Тельман қишлоғида Қирғизистонни Ўзбекистон билан боғловчи ерости туннели топилганди. 4 июнь куни турар жой биносининг бетон қопламаси остидан икки мамлакатни боғлайдиган яна бир яширин ўтиш жойи аниқланганди.
Эслатиб ўтамиз, 2022 йилнинг июнида Қирғизистон билан чегарада яширин ерости йўллари қазиганларга суд ҳукми ўқилганди. Жиноят ишлари бўйича Норин туман судининг ҳукмига кўра, қонунбузарларга нисбатан 6 йилдан 8 йилгача озодликдан маҳрум этиш жазоси тайинланган.
