Meta компанияси икки йиллик блокланишдан кейин АҚШнинг собиқ президенти Дональд Трампнинг Facebook ва Instagram ижтимоий тармоқлардаги аккаунтларини қайта тиклаб берди, деб ёзади Reuters.

Январь ойида Meta’нинг глобал масалалар бўйича президенти Ник Клегг собиқ президентга тегишли аккуантлар блокдан чиқарилиши режаси ҳақида гапирганди. Унинг сўзларига кўра, блокдан чиқариш Трампнинг 2024 йилги президентлик сайловларида иштирок этиш режалари сабаб амалга оширилади.

Шу билан бирга, Клеггнинг таъкидлашича, ижтимоий тармоқларнинг янги қоидалари сабаб АҚШ собиқ президенти бошқалардан кўра жиддийроқ жазога тортилади: агарда Трамп Meta қоидаларини бузадиган контентни эълон қилса, ушбу пост ўчириб ташланади, аккаунтнинг ўзи эса бир ойдан 2 йил муддатгача блокланади.

Обуначилари сони мос равишда 34 ва 23 миллион кишини ташкил этадиган Facebook ҳамда Instagram’га қайтиш-қайтмаслиги ҳозирча номаълум. Аввалроқ Twitter уни блокдан чиқарган, бироқ сиёсатчи ҳозирча у ерга ҳеч нима ёзгани йўқ. Шунингдек, 20 ноябрь куни Twitter’нинг янги эгаси Илон Маск Трампнинг аккаунтини тиклаганлиги ҳақида хабар пайдо бўлганди. Унинг ўзи Twitter’га қайтмаслигини айтганди.

Twitter 2021 йил бошида унинг тарафдорлари томонидан Капитолийга қилинган ҳужумдан сўнг Дональд Трампнинг аккаунтини блоклаб қўйганди. Трампнинг сўнгги твити ушбу воқеалардан икки кун ўтгач ёзилган. Унда Дональд Трамп сайланган Президент Жо Байденнинг инаугурациясига бормаслигини айтган.