Кейинги беш йил ичида ернинг сейсмик фаоллиги ошади, бу эса зилзилаларнинг тез-тез содир бўлишига олиб келади. Бу ҳақда Россия фанлар академиясининг геофизика хизмати директори техника фанлари доктори Юрий Виноградов маълум қилди.

Унинг сўзларига кўра, сайёрадаги 9 балли силкинишлар ўртача 5-7 йилда бир марта, 8 баллиси эса йилига икки-уч марта содир бўлади. Аммо сўнгги тўрт йил ичида ернинг сейсмик фаоллиги жуда ҳам экстремал даражада юқори эмас.

«Охирги 30-40 йиллик ўртача кўрсаткичдан келиб чиқилса, келгуси беш йил зилзилалар частотаси мазкур ўртача кўрсаткичдан бироз юқорироқ бўлишига ишониш учун асослар етарли, демак, мос равишда зилзилалар сони кўпаяди», — дейди эксперт.

Олимлар энг кўп сейсмик фаол жойни айта олмайди. Бироқ дунёдаги сейсмик хавфли зоналар маълум ва у ерда ҳар доим бунга тайёр туриш керак. Россияда бу ҳудудлар Камчатка, Курил, Сахалин, Байкал, Олтой-Саян ўлкаси ва Кавказ тоғликларига тўғри келади.

Нидерланд сейсмолиги Франк Ҳугербитс эса сунъий йўлдош дастурий маҳсулотлари ва сезилар сезилмас астрономик ўзгаришларнинг чуқур таҳлиллари асосида келгусида 7,5 магнитудалик кучли зилзила ўчоғи Ҳиндистон, Афғонистон ва Покистон ҳудудларидан бирида кузатилишини прогноз қилган.

«Албатта, бу прогноз. Олим ўзининг Twitter саҳифаларида жуда кўплаб шу каби прогнозларни жойлаган. Табиийки, жуда кўпи оқламаган, аммо Туркиядаги кучли зилзила ҳақидаги прогнози ўзини оқлагани учун кўпчилик унинг кутилмаларига эътибор қаратмоқда», — деб ёзади иқлимшунос Эркин Абдулаҳатов.

Магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатли ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.

Аввалроқ Ўзбекистон ҳам Фавқулодда вазиятлар вазирлигининг бир гуруҳ қутқарувчиларини жўнатгани, Туркия президенти Ражаб Тоййиб Эрдўғон ҳалок бўлганлар хотирасига мамлакатда 7 кунлик мотам эълон қилгани тўғрисида хабар берилганди.