Марказий банкнинг хабар беришича, «Банк ҳисобварақларини очиш, юритиш ва ёпиш тартиби тўғрисида»ги йўриқнома Адлия вазирлигида давлат рўйхатидан ўтказилди.

Қайд этилишича, эндиликда Ўзбекистон фуқаролари бўлган юридик шахслар ҳамда якка тартибдаги тадбиркорларга банк ҳисобварақларини 2023 йил 1 майдан бошлаб, нафақат давлат рўйхатидан ўтиш жараёнида, балки фаолияти давомида ҳам банк ҳисобварақларини масофадан туриб очишга рухсат берилади.

Янги қоидаларга кўра, ҳисобварақни очиш учун тақдим этиладиган ҳужжатларни электрон сақлаш имконияти бўлганда, қоғозда сақламаслик ҳуқуқи берилмоқда. Шунингдек, ногиронлиги бўлган шахсларга факсимил имзодан фойдаланишга рухсат берилади.

Бундан ташқари, хўжалик субъектига асосий ҳисобварақ очган банк орқали ўзининг барча банклардаги ҳисобварақлари рўйхатини банк депозиторларининг миллий ахборот базасидан олиш имконияти берилади.

Эслатиб ўтамиз, аввалроқ  Ўзбекистонда банк ҳисоб рақамидан унинг эгаси розилигисиз пул ечиб олганлик учун жавобгарлик жорий этилиши мумкинлиги ҳақида хабар берилганди.