Ҳудудларнинг ижтимоий-иқтисодий ривожи билан танишиш мақсадида Жиззах вилоятига ташрифини Пахтакор туманидан бошлаган Шавкат Мирзиёев 10 февраль куни «Жиззах» эркин иқтисодий зонасида яқинда ишга туширилган корхоналар фаолияти билан танишди. Бу ҳақда Президент матбуот хизмати хабар берди.

Бугунги кунда «Жиззах» эркин иқтисодий зонасида 27 та лойиҳа амалга оширилиб, 5 минг 300 га яқин иш ўрни яратилган. Шунингдек, охирги йилларда унинг фаолияти такомиллаштирилиб, бизнесга қулайлик кенгайтирилди.  Ҳозир бу ерда кўп турдаги саноат маҳсулотлари ишлаб чиқарилмоқда. Хусусан, улар қаторига 2022 йил октябрда «Iruskon» қандолат корхонаси ҳам қўшилди. Президент корхонанинг иш жараёни ҳамда маҳсулотларини кўздан кечирди.

Йиллик қуввати 12 минг тонна бўлган корхонада Россия, Туркия, Германия ва Италия тажрибаси асосида «Deya» бренди билан экспортбоп маҳсулотлар ишлаб чиқарилмоқда.

Шунингдек, давлат раҳбари йилига 3 миллион дона қувур ва фитинг маҳсулотлари, қурилиш материаллари тайёрланувчи қтисодий зонадаги яна бир корхона — «Master Building Products» фаолияти билан ҳам танишди. Бундан ташқари, «Global Optical Communication» Ўзбекистон-Жанубий Корея қўшма корхонаси ҳам кўздан кечирилди. Бу ерда йилига 85 минг километрлик оптик толали кабель маҳсулотлари ишлаб чиқарилмоқда ҳамда 115 киши иш ўрни билан таъминланган.

Ташриф давомида Президент корхоналарда маҳаллийлаштириш даражасини ошириб, импорт ўрнини босувчи ва экспортбоп маҳсулотлар ишлаб чиқариш бўйича кўрсатмалар берди.

Эслатиб ўтамиз, аввалроқ Шавкат Мирзиёев Фарғона водийси вилоятларига ташриф буюрганди.