Январь ойида кучли қор ёғиши ва аномал совуқдан сўнг Тошкентда янги тротуарлар ва велосипед йўлаклари шикастлана бошлади, деб хабар беради Gazeta.uz.

Пойтахт марказидаги Шаҳрисабз кўчасида шу ҳафтада ободонлаштириш хизмати ходимлари бетон бўлакларини супуриб, тозалаган. Пойтахт ҳокимлиги матбуот хизмати нашр сўровига жавобан туман ҳокимликлари томонидан пиёдалар йўлаклари инвентаризациядан ўтказилиб, уларни капитал ва жорий таъмирлаш режаси тайёрлангани ҳақида маълумот берган. Об-ҳаво яхшиланиши биланоқ ишлар бошланиши кутилмоқда.

«Мутахассислар зарар миқдори ва таъмирлаш харажатларини ҳисоб-китоб қилишди. Ишлар кимнинг ҳисобидан амалга оширилиши — бюджетми ёки пудратчи — ҳозирча номаълум», — дея қайд этди матбуот хизмати.

Ёмғирдан кейин кўчаларда чуқурлар пайдо бўлгани ҳақидаги саволга жавобан шаҳар ҳокимлиги ҳар йили февраль ёки март ойларида кўчаларнинг йўл қисмини таъмирлаш бўйича ҳоким қарори чиқарилишини таъкидлаган. Ҳозирча бундай ҳужжат қабул қилингани йўқ.

Эслатиб ўтамиз, 2022 йил февралида Олий Мажлис Сенати раиси Танзила Норбоева республикадаги велосипед транспорти ҳаракати учун қилинаётган ишлар ва уларнинг ҳолатини танқид остига олганди. Сенат раисининг сўзларига кўра, пиёдалар ҳаракатланиши участкаларида велосипед учун йўлаклар ажратиш бўйича давлат стандарти жорий этилмаган. Шу сабабли айрим ҳудудларда барпо этилаётган велосипед йўлаклари талабларга мутлақо жавоб бермаслик ҳолатлари аниқланган.