Флорида губернатори ва Республикачилар партияси аъзоси Рон Десантис АҚШда 2024 йилда ўтказиладиган президентлик сайловларида ўз номзодини илгари суришга тайёргарлик кўрмоқда, деб хабар беради Bloomberg. Ҳозирча Десантис бу ҳақда расман эълон қилмаган.

Агентлик манбаларининг маълумотларига кўра, «парда ортида» Десантис ҳамда бир жамоа маслаҳатчилари ҳозирда сўровлар ўтказиб, президентлик кампаниясида иштирок этиш учун консультантларни қидирмоқда. Февраль ойининг охирги дам олиш кунлари Флорида штатидаги Палм-Бич шаҳридаги меҳмонхонада 150 га яқин донорлар, Республикачилар партияси раҳбарлари ва ҳукумат амалдорлари учун семинар режалаштирилган.

Десантиснинг жамоаси, шунингдек, Айова, Нью-Хэмпшир, Пенсильвания ва Жанубий Каролина каби штатларнинг республикачи губернаторлари роасидан ҳам ҳаммаслак изламоқда.

Bloomberg экспертлари Десантисни АҚШнинг собиқ президенти Дональд Трампга асосий рақиб дея ҳисоблаяпти. «Десантисда ҳозирданоқ кампания бошлашга сабаб йўқ. У машҳур ва пул тўлаш қобилиятига эга», — дейди Республикачилар партияси Миллий қўмитасининг собиқ сиёсий директори Майк ДюХейм. Унинг сўзларига кўра, Десантиснинг номзоди «Трампни ақлдан оздиради».

Рон Десантис 1978 йилда Жэксонвиллда дунёга келган. 2001 йилда Йель университетини аълога тамомлаган, бир йил Дарлингтон мактабида тарих ўқитувчиси бўлиб ишлаган, Гарвард юридик мактабига кириб, уни 2005 йили юриспруденция доктори даражасида тамомлаган. 2018 йил августда Десантис Флоридада ўтказилган губернаторлик сайловларида ғалаба қозонган ва штатнинг 46-губернаторига айланган.

Аввалроқ Трамп 2024 йилги президентлик сайловларида қатнашиш учун ариза бергани, Трамп сайловда қатнашишига тўсқинлик қиладиган ягона сабабни айтгани ҳақида хабар берилганди. Шунингдек, декабрь охирларида Вакиллар палатасининг 2021 йили Капитолийга қилинган ҳужумни тергов қилаётган қўмитаси ўзининг якуний ҳисоботини эълон қилган ва Трампга давлат лавозимларида ишлашни тақиқлашини билдирганди.

Эслатиб ўтамиз, Трамп тарафдорлари 2021 йил 6 январда Капитолийга бостириб кирганди. Оқибатда беш киши, жумладан, бир полициячи ҳалок бўлган. АҚШ президенти Жо Байден буни қуролли қўзғолон деб атаган.