Туркиядаги кучли зилзиладан омон қолганлар очиқ ҳавода ва «даҳшатли шароитда» қолган бўлиб, бу ер ости силкинишлари оқибатида ҳалок бўлганлар сонига тенг яна шунча қурбонларни юзага келтириши мумкин. Бу ҳақда Жаҳон соғлиқни сақлаш ташкилоти (ЖССТ)нинг шу каби ҳодисалар билан шуғулланувчи департаменти вакили Роберт Холденга таяниб CNN хабар берди.

Унинг сўзларига кўра, омон қолганларнинг аксарияти сув, ёнилғи, электр энергияси, алоқа ва «ҳаёт учун муҳим» бошқа воситалардан узилиб қолган.

«Иккиламчи ҳалокат юзага келишининг ҳақиқий хавфи мавжуд ва жадаллик билан ҳаракат қилмасак ҳамда қидирув-қутқарув ишларини амалга оширмасак, у биринчи ҳалокатдан кўра кўпроқ инсонларга зарар етказиши мумкин», — дейди Холден.

Бундан ташқари, телеканалнинг қайд этишича, Туркия ва Суриянинг зилзила содир бўлган ҳудудларида ҳаво ҳарорати доимгидан анча паст даражада экани вазиятни мураккаблаштирмоқда. Масалан, Ҳалабда жорий дам олиш кунлари 3 даража совуқни ташкил этган, одатда февраль ойида бу ерда ҳарорат 2,5 даража илиқ бўларди.

Сўнгги маълумотларга кўра, Туркияда зилзила оқибатида 20 мингдан ортиқ одам ҳалок бўлган, 80 мингдан зиёд фуқаро жабрланган. Мамлакатдаги 6,5 минг бино вайронага айланган. Сурияда эса қурбонлар сони 3553 кишини ташкил этмоқда. Мамлакат Соғлиқни сақлаш вазирлиги 1387 киши вафот этганини билдирган, яна 2166 киши Дамашқ назорати остида бўлмаган ҳудудларда ҳалок бўлган.

Шунингдек, Сурияда озиқ-овқат ва тоза сув етишмовчилиги сабаб эпидемия бошланиши мумкин. «Ҳозирда чора кўрмасак, миллионлаб инсонларга таъсир кўрсатадиган эпидемия бошланиши мумкин», — деганди UNICEF’нинг Яқин Шарқ ва Шимолий Африка бўйича минтақавий бўлинмаси вакили Аммар Аммар.

Аввалроқ Ўзбекистон ҳам Фавқулодда вазиятлар вазирлигининг бир гуруҳ қутқарувчиларини жўнатгани, Туркия президенти Ражаб Тоййиб Эрдўғон ҳалок бўлганлар хотирасига мамлакатда 7 кунлик мотам эълон қилгани тўғрисида хабар берилганди.

Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Экспертларнинг фикрича, Истанбулда 2030 йилга қадар магнитудаси 7,6 балли зилзила содир бўлади. «Биз магнитудани биламиз. Биз жойини биламиз. Фақат айнан қачон юз беришини билмаймиз. Аммо 65 фоизли эҳтимолликка кўра, 2030 йилга қадар Истанбул 7,6 магнитудали зилзиладан жабр кўради. Бу жуда юқори эҳтимоллик», — деган профессор Окан Туйсуз.