Инвестициялар, саноат ва савдо вазирлигида (ИССВ) Ўзбекистоннинг Жаҳон савдо ташкилоти (ЖСТ)га аъзо бўлиш жараёни доирасида Буюк Британия элчиси Тим Торлот ҳамда Британия Бизнес ва савдо департаменти мутахассислари билан икки томонлама музокаралар бўлиб ўтди. Бу ҳақда «Дунё» агентлиги хабар берди.

ИССВ маълумотига кўра, музокараларда Ўзбекистоннинг ЖСТга аъзо бўлиши бўйича музокаралар гуруҳи аъзолари, шунингдек, Адлия вазирлиги, Иқтисодиёт ва молия вазирлиги, Божхона қўмитаси ва Монополияга қарши курашиш қўмитаси вакиллари иштирок этган.

Суҳбат чоғида Ўзбекистон томонидан ташкилотга аъзо бўлиш бўйича, хусусан, Ўзбекистоннинг ЖСТга аъзо бўлиш бўйича ишчи гуруҳининг навбатдаги 6-йиғилишига тайёргарлик кўриш юзасидан амалга оширилган ишлар тўғрисида батафсил маълумот берилган. Бундан ташқари, Ўзбекистон томонидан тақдим этилган барча ҳужжатлар бўйича Буюк Британия мутахассисларини қизиқтирган саволларга жавоб қайтарилган.

«Шу билан бирга, Буюк Британиянинг Ўзбекистоннинг ташкилотга аъзо бўлиш жараёнига техник кўмак кўрсатиш лойиҳаси доирасида ҳамкорликнинг истиқболли йўналишлари муҳокама қилинди», дейилади хабарда.

Музокаралар якунлари бўйича келгусида ҳамкорликни давом эттириш ва икки томонлама музокаралар жараёнини жадаллаштириш бўйича аниқ қўшма чора-тадбирларни кўришга тайёрлик билдирилган.

Аввалроқ АҚШ Ўзбекистонга ЖСТга аъзо бўлишда ёрдам бериши, Тожикистон Ўзбекистонга ЖСТга аъзо бўлиш борасидаги тажрибасини таклиф қилгани тўғрисида хабар берилганди.

Эслатиб ўтамиз, август бошида Ўзбекистоннинг ЖСТга аъзо бўлиши доирасида 5-йиғилиш бўлиб ўтганди. ЖСТга аъзо бўлиш доирасида фаол икки томонлама музокаралар ўтказиш, алоҳида қўшимча ҳужжатларни тайёрлаш ва тақдим этиш каби 2022 йилнинг охиригача амалга ошириладиган асосий вазифалар белгилан эди. Декабрь ўрталарида Ўзбекистоннинг Жаҳон савдо ташкилотига аъзо бўлиш жараёни тезлаштирилиши маълум бўлганди.