«Ўзбекнефтгаз» АЖ PWC консалтинг компанияси билан ҳамкорликда биринчи марта 2021 йил учун Барқарор ривожланиш ҳисоботини (ESG) тайёрлади ва эълон қилди.

Маълумот учун, Global Reporting Initiative (GRI) ва Барқарор ривожланиш ҳисоб стандартлари кенгаши (SASB) стандартлари тизими асосида барқарор ривожланиш соҳасидаги ҳисоботларни тайёрлаш замонавий компанияларни экологик, ижтимоий ва корпоратив бошқарув вазифаларини ҳал қилишга жалб қилиш ва уларнинг маҳаллий, минтақавий ва глобал даражада барқарор ривожланишга қўшган ҳиссасини акс эттиришга қаратилган.

«Ўзбекнефтгаз» АЖ Барқарор ривожланиши тўғрисидаги ҳисоботни ишлаб чиқишда асосий эътиборни қуйидаги учта тамойилга қаратган:

• атроф-муҳитга масъулият билан ёндашиш;
• ижтимоий масъулият;
• корпоратив бошқарувнинг сифати.

Ҳисоботни тайёрлашда менежмент ва ривожланиш стратегияси, иқтисодий кўрсаткичлар, экологик қонунларга риоя қилиш, ходимлар саломатлиги ва хавфсизлиги каби муҳим мавзулар доирасида умумий кўрсаткичлар тўлиқ очиб берилган.

«100 та GRI кўрсаткичидан 97 таси, шунингдек, 12 та SASB кўрсаткичдан 9 таси тўлиқ ошкор қилинди. Кўрсаткичлар халқаро стандартларга мувофиқ тўлиқ очиб берилган бўлиб, бу ‘Ўзбекнефтгаз’ АЖнинг муваффақиятли ташкилий ишлари ва инвестицион жозибадорлигини таъкидлайди», дейилади хабарда.

Таъкидланишича, ESG тамойилларини жорий қилиш компаниянинг жамиятга, шу жумладан, атроф-муҳит ва иқтисодиётга таъсирини ҳисобга олган ҳолда ишлашини англатади. Бу нафақат бутун иқтисодиётнинг барқарор ривожланишини таъминлашга ёрдам беради, балки компаниянинг молиявий бўлмаган хатарларини камайтиради, унинг барқарорлигини таъминлайди.

Аввалроқ «Ўзбекнефтгаз» АЖ бошқарув раиси Меҳриддин Абдуллаев бошчилигидаги ишчи гуруҳ томонидан Қашқадарё вилоятида жойлашган конларда газ қазиб чиқаришни кўпайтириш ва геологик-техник тадбирларни амалга ошириш бўйича амалга оширилаётган тадбирларнинг ҳолатини назорат қилиш ишлари давом этаётгани хабар қилинганди.